Militante CNRT Hakarak Orienta Eleitór Tama To’o Fatin Votasaun

Hatutan.com, (19 Abríl 2022), Díli—Militante husi partidu Kongresu Nasionál Rekonstrusaun Timoroan (CNRT, sigla portugés) koko ajuda polling staff  ka brigada CNE ho STAE nian iha Sentru Votasaun Institutu Siénsia Saúde (ICS), Comoro, Díli, maibé regra la permite. Nune’e, CNE ho STAE la admite aktu voluntáriu ne’e tanba tama bá fatin votasaun la’ós militante partidu polítiku sira-nian, maibé polling staff ka brigada STAE ho CNE nia kompeténsia.

Eleitór sira forma hodi hakat ba vota iha eleisaun prezidensiál segunda volta, 19 Abríl 2022. Foto/Espesiál

“Hahú ohin dadeer to’o agora, ema vota ho hakmatek no di’ak tebes, maske ohin iha dunik militante husi partidu CNRT nian ne’ebé hakarak ajuda brigada STAE ho CNE hodi orienta eleitór sira tuir formatura hodi tama ba fatin votasaun. Ne’e hanesan ami-nia servisu tanba ne’e ohin esplika ona ba sira katak ida-ne’e servisu STAE no CNE nian, ita-boot sira la hola parte no bele halo observasaun de’it, nune’e sira mós simu no ami kontinua halo servisu,” observadór CNE, Anastasia Gonzaga haktuir bá Hatutan.com hafoin halo observasaun iha sentru votasaun ICS, Comoro, Tersa (19/04/2022).

Nia esplika, iha diferente entre votasaun primeiru ronde no segundu ronde nian, tanba iha primeira ronde eleitór barak, maibé iha segundu ronde ema laiha tanba foin tuku 12:00 Otl, formatura iha sentru votasaun laiha ona.

Observasaun Hatutan.com iha sentru votasaun ICS Comoro hahú loke iha tuku 7:00 dadeer. Total eleitós sira iha suku Comoro 30.497 ho sentru votasaun 12 maka hanesan Escola Bazika Filial Fomentu, E.P.S Nicolau Lobato, E.B.F 12 de Outubru, E.S Finantil, E.B.F Aimutin, E.P.S 30 de Agostu, E.P.S São Pedro, E.P no 5 Kampung Baru, Eskola Alfatera Maslidun, Institutu Ciensia Saude, Edefisiu INAP (sentru Paralelu), Sede aldeia Aimutin.

Total eleitores iha kapital Dili 190. 710 ho sentru votasaun 130, estasaun de votus 237. Iha sentru votasaun refere, hetan observasaun direta husi observadór internasionál no nasionál, fiskál sira kandidatu Prezidente Repúblika nian, autoridade iha kada munisípiu no hetan seguransa hosi PNTL.

 Jornalista: Carmelita Isaac