Polítika
Rogério Lobato Fó Konfiansa Bá Ramos-Horta Hodi Lori Dezenvolvimentu
Hatutan.com, (19 Abríl 2022), Díli—Kandidatu Prezidente Repúblika iha primeira volta, Rogério Tiago Lobato ezerse nia direitu votu iha eleisaun segunda volta ne’e, ho konfiansa tomak ba kandidatu Prezidente Repúblika ho númeru sorteiu ida (1), José Manuel Ramos-Horta ho esperansa katak bainhira Horta eleitu bele hakuak ema hotu hamutuk hodi lori lalais dezenvolvimentu mai Timor-Leste.
Lee Mós : Ramos-Horta Garante Vitória no Promove Diálogu
Regério Tiago Lobato akompaña Ramos-Horta iha mini kampaña iha Soibada, Manatuto, 07 Abríl 2022. Foto/Hatutan.com
“Imi hatene katak durante ne’e ha’u apoia se. Ha’u la apoia bá maun Xanana, maibé apoia bá José Ramos-Horta. Ha’u nunka husik nia mesak no ha’u fiar katak karik nia sai PR nia bele hakuak ema hotu no sei halo ema hotu hamutuk hodi lori lalais dezenvolvimentu mai ita-nia rai, maibé se de’it maka manan tenke respeita povu nia votu,” Rogério Tiago Lobato ba jornalista sira hafoin vota iha sentru votasaun EP.05 Kampung Baru, Comoro, Tersa (19/04/2022).
Nia mós apela ba sidadaun hotu atu ejerse diretu vota ho hakmatek hodi hili kandidatu ba Prezidente Repúblika ne’ebé maka merese.
Iha sorin seluk, nudár komunidade ho esperansa ba kandidatura ne’ebé deit maka sai Prezidente Repúblika atu labele sura no rekere sira nia terus ba rai Timor, tanba la’ós ona tempu atu rekere malu, maibé oinsá hamutuk hodi halo dezenvolvimentu ba povu.
Total eleitór sira iha suku Comoro 30.497 ho sentru votasaun 12 maka hanesan Escola Bázika Filial Fomentu, E.P.S Nicolau Lobato, E.B.F 12 de Outubru, E.S Finantil, E.B.F Aimutin, E.P.S 30 de Agostu, E.P.S São Pedro, E.P no 5 Kampung Baru, Eskola Alfatera Maslidun, Institutu Siénsia Saúde, Edifísiu INAP (sentru Paralelu), Sede aldeia Aimutin.
Total eleitór sira iha kapitál Díli 190. 710 ho sentru votasaun 130, estasaun votasaun 237. Iha sentru votasaun refere, hetan observasaun husi observadór internasionál no nasionál, fiskál sira kandidatu nian, autoridade iha kada munisípiu no hetan seguransa husi PNTL.
Jornalista: Carmelita Isaac