CNE Sei Verifika Rezultadu Rekonsiliasaun Akta Husi STAE

Hatutan.com, (21 Abríl 2022), Díli- Komisaun Nasional Eleisaun (CNE, sigla portugés) sei halo verifikasaun ba akta sira ne’ebé Sekretariadu Tékniku Administrasaun Eleitorál (STAE) rekonsilia husi munisípiu 12 no Rejiaun Administrativu Espesiál Oé-Cusse (RAEOA), inklui mós ho akta sira husi diaspora molok halo apuramentu nasionál hodi anúnsiu rezultadu provizóriu no haruka ba Tribunál Rekursu atu hetan validasaun.

Lee Mós : José Ramos Horta Eleitu ba Prezidente Repúblika Períudu 2022-2027

Prezidente CNE, José Agostinho Belo (klaran), halo konférensia imprensa, 21 Abríl 2022. Foto/Hatutan.com

Prezidente CNE, José Agostinho Belo, ba jornalista sira iha konferénsia ba imprensa ne’ebé hala’o iha sede CNE, Caicoli, Kinta (21/04/2022) hateten, hahú Sesta aban, durante loron tolu nia laran, apuramentu nasionál komesa no rezultadu provizóriu CNE mak sei fó sai molok to’o bá iha Tribunál Rekursu hodi halo validasaun.

STAE iha kompeténsia atu halo rekonsiliasaun ba akta nivel munisipál no rezultadu hotu tenke submete ba iha CNE hodi halo verifikasaun durante oras 72 nia laran hafoin halo akta no fó sai rezultadu provizóriu.

“Tuir lei CNE mak iha kompeténsia atu anúnsiu rezultadu provizóriu no validasaun ba rezultadu eleisaun prosesu tomak iha Tribunál Rekursu mak sei pronunsia,” José Agostinho Belo hateten.

Tasa partisipasaun sidadaun sira nian iha eleisaun prezidensiál segunda volta, tuir CNE nia observasaun hatudu  másimu nafatin no hatudu rezultadu pozitivu tamba sidadaun sira kuaze iha koñesimentu atu vota, nune’e númeru votu nulu menus kompara ho eleisaun primeira volta.

“Votu nulu iha eleisaun prezidensiál segunda volta iha de’it 5000 kompara ho eleisaun primeira ronde ne’ebé atinje 12000,” nia informa.

Prezidente CNE ne’e subliña prosesu eleisaun to’o mai iha rekonsiliasaun no apuramentu munisipál kuaze lao di’ak maske iha insidente balun ne’ebé mosu, maibé ne’e la lori impaktu negativu ba susesu ne’ebé iha.

To’o oras ne’e akta husi munisípiu 11 no RAEO iha ona CNE nasionál no hela de’it akta husi diaspora no Munisípiu Covalima ne’ebé oras ne’e sei iha dalan tamba situasaun udan no dalan ne’ebé sai hanesan difikulta mós transportasaun akta mai iha nasionál.

Jornalista: Vito Salvador