CNRT Hato’o Parabens Bá Ramos-Horta ho Lú Olo

Hatutan.com, (21 Abríl 2022), Díli- Partidu Konsellu Nasionál Rekonstrusaun Timor (CNRT, sigla portugés) hato’o parabens bá kandidatu Prezidente Repúblika períodu 2022-2027, José Manuel Ramos-Horta ho Francisco Guterres “Lú Olo” ne’ebé fó ona kontribuisaun bá festa demokrasia ida di’ak no justu tuir regra demokrasia nian.

Lee Mós: José Ramos Horta Eleitu ba Prezidente Repúblika Períudu 2022-2027

Partidu CNRT hato’o parabens ba Kandidatu Prezidente Repúblika, José Ramos-Horta ho Francisco Guterres “Lú Olo. Foto/Hatutan.com

Liuhusi konferénsia imprensa ne’ebé hala’o iha Sede Nasionál Kandidatu José Ramos-Horta nian iha Hudi-Laran, Díli, Kinta (21/04/2022), kuadru prinsipál partidu CNRT ne’ebé lidera husi Sekretáriu Jerál, Francisco Kalbuadi LaY, lori partidu CNRT nia naran hato’o apresiasaun no gratidaun ba kandidatu Prezidnente na’in-rua iha eleisaun prezidensiál segunda volta; José Ramos-Horta ho Francisco Guterres “Lú Olo” ne’ebé mó kontribui tebetebes bá prosesu demokratizasaun iha Timor Leste la;o di’ak no nakonu iha pás no domin.

Francisco Kalbuadi Lay agradese mós ba lider karizmátiku no nu’udár mós prezidente partidu CNRT, Kay Rala Xanana Gusmão, durante ne’e sempre hamutuk ho ema hotu hodi lori susesu ba kandidatu Prezidente Repúblika José Ramos-Horta iha eleisaun prezidensiál ne’e.

“Ha’u halo apelu  ida ba hotu-hotu atu hakmatek no kria nafatin estabilidade no kontribui nafatin pás no domin. Ita nafatin husu Maromak Nia bensaun bá povu no lider sira hotu atu nafatin iha dame no domin ba malu,” Francisco Kalbuadi Lay tenik.

Eleisaun prezidensiál segunda volta, 19 Abríl ne’e, provizoriamente hatudu rezultadu katak José Ramos-Horta okupa pozisaun dahuluk no eleitu ba prezidente Repúblika 2022-20227.

Tuir rezultadu kontajen no apuramentu bazeia ba akta sira ne’ebé fiskál partidu CNRT halibur husi sentru votasaun 1200 iha territóriu nasionál no diaspora (Austrália, Portugal, Korea do Súl, Norte Irlanda ho Reinu Unidu)  hatudu, José Ramos-Horta hetan votu hamutuk 397.145 (62.09%).

Sekretáriu Jerál partidu CNRT, Francisco Kalbuadi Lay, entrega rezultadu apuramentu partidu nian no akta sira ne’ebé iha bá reprezentante Prezidente Repúblika eleitu, Tomas Cabral. Foto/Hatutan.com

Husi total númeru votante ne’ebé iha hatudu Munisipiu Aileu José Ramos-Horta hetan votu 20.176, Ainaro (25. 053 votu), Baucau (23.217), Bobonaro (35.536), Covalima (25.462), Díli (98795), Ermera (46.371), Lautem (17.027), Liquiça (26.994), Manatuto (20.615), Manufahi (19.453), RAEO-Oé-Cusse (23.832), Viqueque (13.172) no diaspora hanesan Melbourne (46), Sydney (70), Darwin (78), Korea do Súl (33),  Lizboa no Portu (141), Norte Irlanda (258) ho Reinu Unidu (326 votu).

“Ida ne’e rezultadu provizóriu ne’ebé partidu CNRT iha no ultimo desizaun ita tenke hein husi Tribunál Rekursu,” Francisco Kalbuadi Lay hateten.

Hafoin fó sai rezultadu ne’e, partidu CNRT entrega kedas rezultadu apuramentu partidu nian no akta sira ne’ebé iha bá iha reprezentante prezidente eleitu, Tomas Cabral atu bele fasilita ekipa nia servisu uainhira akompaña apuramentu nasionál husi CNE.

 Jornalista: Vito Savador