Nasionál
Governu Hahú Diskute Atu Harii Estaleiru Nasionál
Hatutan.com, (25 Abríl 2022), Díli-Governu liuhusi Ministru Transporte no Komunikasaun (MTK), José Agostinho da Silva, Ministériu Defeza (MD), Filomeno da Paixão de Jesus, Vise-Ministru Interior (MI), António Armindo, hamutuk ho Primeiru-Ministru (PM), Taur Matan Ruak, Segunda (25/04/2022), hahú ko’alia no diskute preparasaun sira oinsá mak bele harii estaleiru ida iha Timor-Leste, nune’e bele halo manutensaun rasik bá ró sira iha rai-laran.
Ministru Transporte no Komunikasaun (MTK), José Agostinho da Silva. Foto/Hatutan.com.
“Ami mai halo audiénsia ho Primeiru-Ministru, Taur Matan Ruak, kona-bá oinsá mak ita kria infraestrutura para bele halo manutensaun ba ró iha ita-nia rai-laran,” Ministru José Agostinho da Silva, informa bá jornalista sira, hafoin sorumutuk iha ho Primeiru-Ministru Taur Matan Ruak, rezidénsia Estadu Primeiru-Ministru nian iha Faról, Díli.
Ministériu tolu ne’ebé mak sira-nia ró-ahi iha mesak mak hanesan, Ministériu Defeza (MD) ró bá FALINTIL-Forsa Defeza Timor-Leste (F-FDTL), iha Komponente Navál, Hera. Ministériu Interior (MI) iha ró bá Unidade Polísia Marítima (UPM), Ministériu Saúde (MS) iha ró ambulánsia, inklui Ministériu Agrikultura no Peska (MAP).
“Agora, objetivu hosi manutensaun ne’e, atu halo saida? Ne’e primeiru, atu asegura safety security bá ró-ahi ne’e rasik. Segundu, ba tripulante sira iha ró laran. Terseiru, karik, ró ne’e bá pasajeiru, entaun oinsá maka asegura safety security ba pasajeiru sira. Manutensaun ne’e importante,” Ministru José Agostinho da Silva esplika.
Tuir artigu xave sira hosi konvensaun sira solás nian kona-bá, safety of life at sea katak, ró sira ne’ebé transporta pasajeiru (ema), no sasán sira, anualmente ka durante fulan 12 ne’e, obrigatóriu tenke ba halo manutensaun. Ezemplu ida, Ró Berlin Nakroma ne’ebé kada tinan MTK sempre buka dalan lori ba halo manutensaun iha rai-li’ur.
Esperiénsia iha tinan-rua kotuk, bainhira ró sira ne’ebé mak Governu lori bá hadi’a iha rai-li’ur, ninia kustu orsamentu atinje to’o rihun $580. Nune’e, tuir Ministru José Agostinho, kustu orsamentu ida ne’e foin mak bá iha manutensaun nian. Maibé mós tenke hanoin katak, bainhira atu lori rò sira ne’ebé ba halo manutensaun, tenke iha ona ró substituisaun ruma, hodi bele kontinua asegura konektividade.
“Governu aluga roo ida, Tranship II, ne’e maka sai polémika boot iha tempu ne’e. Ne’ebé, importante ohin mai ne’e, atu oinsá maka kria ita-nia kondisiona rai laran atu ita-nia ró sira-ne’e halo manutensaun de’it iha ita-nia estaleiru ne’ebé ita buka harii daudaun,” nia tenik.
Prosesu sira preparasaun bá hari’i estaleiru ne’e, oras ne’e la’o hela, no planu sira parte MTK prepara hotu ona no Ajénsia Dezenvolvimentu Nasionál (ADN) mós halo hotu ona aprovasaun. Maibé, prosesu atu halo ka loke konkursu ne’e, sei iha CNA (Comissão Nacional Aprovizionamento) hodi bele aselera konkursu ho karárter ICB.
Jornalista: Rogério Pereira Cárceres