Kazu Internet Ilegál iha Faze Rekolla Dokumentu

Hatutan.com, (28 Abríl 2022), Díli—Ministériu Públiku (MP) kontinua halo investigasaun bá kazu fornesimentu internet ilegál ne’ebé deskonfia komete husi operadór telekomunikasaun hanesan R2M IT Solution, Guardamor, Metrolink, Telemor, Elite Computer, inklui Prezidente Autoridade Nasionál Komunikasaun (ANC), João Olivio Freitas.

Lee Mós: Kazu Internet Ilegál La Prejudika Atribuisaun Lisensa ba Operadór Telekomunikasaun Sira

Adjunta Prokuradora Jerál Republika (PJR), Remigia de Fátima. Foto/Hatutan.com

Adjunta Prokuradora Jerál Repúblika (PJR), Remigia de Fátima, konfirma katak iha faze investigasaun nian, faktu balun konklui ona no balun presiza halo tan investigasaun hodi rekolla informasaun seluk liga ho dokumentu.

“Relativa ho kazu ligasaun internet illegal ha’u hanoin barak involve husi setór telekomunikasaun, nune’e prosesu investigasaun la’o hela tanba balun konklui ona no balun presiza halo tan investigasaun ne’ebé la’o hela hodi rekolla kona-bá informasaun liu-liu rekizita dokumentu sira ba SERVE,” Adjunta Prokuradora Jerál  Republika (PJR), Remigia de Fátima, hateten hodi responde Hatutan.com, iha El-Legendario, Lecidere, Díli, Kinta (28/4/2022).

Nia esplika, bainhira investigasaun remata maka MP sei haruka akuzasaun bá Tribunál hodi submete ba julgamentu.

Lee Mós: Kazu Internet Ilegál, Medida Koasaun TIR La Limita Arguidu Sira-Nia Knar

Antes ne’e, iha loron 24 fulan-Novembru 2021 liu husi primeiru interrogatóriu Tribunál Distritál Dili deside aplika medida koasaun Termu Identidade Rezidénsia (TIR) bá arguidu sira husi kompañia ka operadór telekomunikasaun, ne’ebé deskonfia envolve iha kazu fornesimentu internet ilegál, hanesan R2M IT Solution, Guardamor, Metrolink, Telemor, Elite Computer, inklui Prezidente Autoridade Nasionál Komunikasaun (ANC), João Olivio Freitas.

Maske Tribunal aplika ona TIR ba arguidu sira hodi aprezenta-aan kada semana iha Postu Polísia ne’ebé besik, maibé la hasai liberdade kondisionál no direitu bá vida.

Hatutan.com tenta ona atu halo entrevista ho operadór telekomunikasaun balun ne’ebé deskonfia involve iha kazu ne’e no nia jerente balun sai detidu iha sela Polísia iha tinan 2021, maibé sira lakohi ko’alia buat ruma ka lakohi fó komentáriu ruma tanba segredu justisa.

Jornalista: Carmelita Isaac