Ramos-Horta Tau Ai-funan no Sunu-Lilin iha Semitériu Santa Krús

Hatutan.com, (28 Abríl 2022), Díli—Prezidente Repúblika Eleitu, José Manuel Ramos-Horta, Kinta (28/04/2022), tuku 7:55 Otl, halo vizita ida ba Semitériu Santa Krús, Díli, hodi bá kari ai-funan no sunu-lilin iha rate Saudozu Max Sthal nian.

Prezidente Repúblika Eleitu, José Manuel Ramos-Horta, vizita semitériu Santa Krús hodi kari ai-funan no sunu lilin ba família sira-nia rate ho mós iha rate Saudozu Max Stahl, 28 Abríl 2022. Foto/Hatutan.com

Prezensa Ramos-Horta nian iha Semitériu Santa Krús ne’e hodi fó omenajen no hanoin hikas Saudozu Max Sthal nia loron mate bá fulan nee nian, 28 Abríl ne’e.

Jornalista no realizadór filme dokumentáriu ‘In Cold Blood: The Massacre of East Timor‘, ho naran kompletu Saudozu Cristopher Wenner ‘Max Stahl’, hakotu-iis iha loron 28 fulan-Outubru 2021 iha Brisbane-Austrália.

Oportunidade ne’e, Ramos-Horta mós ba kari ai-funan no sunu lilin ba rate Saudozu Sebastião Gomes, inklui mós rate padre ida nian no vizita mós nia família balun nia rate iha Santa Krús.  

Saudozu Max Stahl husik hela nia família no amigu boot sira iha mundu ne’e tanba sofre moras kankru ne’ebé infiltra iha kakorok hodi halo nia susar dada iis no ikus hakotu iis iha Ospitál Brisbane-Austrália.

Bainhira Saudozu Max Stahl nia ahi-kudesan to’o iha Timor-Leste, liuhusi konferénsia imprensa ida iha  eskritóriu Max Stahl nian iha Benfica, Colmera, Díli, loron 28 fulan-Outubru 2021, José Ramos-Horta, klarifika nia parte  labele vizita Saudozu Max Stahl durante halo tratamentu iha  Ospitál Brisbane-Austrália tanba Austrália taka nia nasaun ho pandemia Covid-19.

Saudozu Max Stahl nu’udar autór filme hahú husi rezisténsia juventude loriku asuwa’in iha tinan 1991 hodi hasai filme ka kapta Masakre Santa Krús, 12 Novembru 1991.

Ramos-Horta tempu ne’ebá hateten, Governu iha devér moral apoiu família Saudozu Max Stahl.

Ho dedikasaun boot bá povu Timor-Leste nia luta ba independénsia ne’e, Estadu Timor-Leste liuhusi Prezidente Repúblika, Francisco Guterres “Lú Olo” kondekora Saudozu Max Stahl ho Orden de Timor-Leste Grau Insígnia iha loron 22 fulan-Novembru 2019.  

Jornalista: Vito Salvadór