Inspetór Jerál Traballu, Rofino Lopes dos Reis. Foto/Hatutan.com
Inspetór Inspeção Gerál do Traballu (IGT), Rofino Lopes dos Reis dehan, seguransa saúde traballu bá traballadór, nu’udár atividade esensiál ida, ne’ebé mak liga ho protesaun bá traballadór sira iha risku asidente, mate, tohar no seluk tan.
“Dala-ruma empreza sira fó servisu bá ema barak, vióla ema nia direitu bá protesaun ba ema-nia vida iha fatin servisu. Ne’e multa boot liu,” Inspetór IGT, Rofino Lopes dos Reis hateten bá Hatutan.com iha kna’ar fatin Hudi-laran, Díli, Kinta (05/05/2022).
Advertisement
Ho infrasaun hosi empreza kona-bá seguransa saúde traballu ne’e, maka iha tinan 2021 nia laran, empreza sira konsege selu multa hodi kontribui bá kofre estadu ho montante $59,390.00.
Bainhira empreza sira mak la halo tuir lei sira ne’ebé vigora, IGT iha papél ida hodi halo akonsellamentu. Maibé, sé empreza sira mak la halo tuir nafatin, husu atu selu ema nia direitu.
“Mais sé nia la halo tuir, ida ne’e aplika sansaun. Entaun, ida ne’e mak momentu, ami nia atividade inspesaun bá tinan 2022 nian,” Rofino Lopes dos Reis dehan.
Tuir IGT nia meta anuál ne’e, kada tinan, sira tenke ezekuta ka halo vizita inspesaun ba empreza sira hamutuk 1400 no bazeia bá dadus 2018 nian, grau infrasaun sa’e to’o 19%.
Iha 2021, grau infrasaun ne’ebé IGT identifika tun tiha ona bá 3%. Signifika katak, komprensaun empreza sira ne’ebé iha ne’e di’ak bá beibeik.