Juñu Finaliza Dezeñu, Novembru Pelican Paradise Hahú Konstrusaun

Hatutan.com, (25 Maiu 2022), Díli—Prezidente Repúblika (PR), José Ramos Horta enkoraza na’in ba empreza Pelican Paradise Edwar Ong, atu labele rende ho prosesu ne’ebé iha no kontinua halo servisu sira ho lais atu projetu Hotel no Apartementu ne’ebé empreza ne’e planeia bele remata iha tempu badak.

Prezidente Repúblika (PR), José Ramos Horta enkoraza na’in ba empreza Pelican Paradise Edwar Ong, atu labele rende ho prosesu ne’ebé iha no kontinua halo servisu sira ho lais atu projetu otél no Apartamentu ne’ebé empreza ne’e planeia bele remata iha tempu badak, Kuarta (25/05/2022). Foto/PR.

Investimentu Pelican Paradise ba faze dahuluk sei gasta orsamentu millaun $100 no kustu investimentu loloos ho totál $400 hodi konstrui apartementu ida no Hotel boot ida ho kapasidade kuartu 1000.

Iha faze dahuluk kona-bá área konstrusaun ne’e sei fó servisu ba Timoroan hamutuk 1.200, fó liu prioridade ba joven sira ne’ebé iha korajen no enerjia foun atu kontinua kontribui ba dezenvolvimentu iha nasaun Timor-Leste.

Prezidente Pelican Paradise Edwar Ong hateten empreza ne’e  mai Timor Leste la’ós atu halo otél hanesan baibain, atu halo otél ho investimentu ida espesiál atu bele dada ema mai Timor-Leste.

Desde tinan 2008 hasoru malu ona ho Ramos-Horta bainhira sei assume mós pasta nu’udár Xefe Estadu hodi ko’alia kona-bá investimentu Pelican Paradise no ohin onra tebes Pelican Paradise bele hasoru hikas Horta nu’udár hodi simu korajen atu bele kontinua servisu ba obra ne’ebé desde tinan 13 liuba mehi ona atu halo iha Timor-Leste.

“Ha’u ba dala uluk liu hasoru-malu ho Prezidente Repúblika iha tinan 2008 no agora onra tebes atu hasoru hikas ba dala ida tán,” Edwar Ong hateten hafoin hasoru-malu ho Ramos-Horta iha Palásiu Prezidensiál Nicolau Lobato, Bairru Pité, Díli, Kuarta (25/05/2022).

Durante prosesu tomak la’o, Empreza ne’e sei nafatin iha Timor-Leste, projetu pelican paradise tinan barak ona no desde uluk kedan to’o agora Prezidente Repúblika José Ramos-Horta sempre fó korajen atu empreza ne’e nafatin pasiénsia hodi hein prosesu sira no aban bainrua governu sei fó suporta ba dezenvolvimentu ne’e.

“Tempu naruk ami hein atu komesa projetu ne’e tanba liu prosesu ho governu ami sempre ezize ba parte relevante tanba mós mosu pandemia COVID-19 ami mós hola desizaun atu halo dezeñu foun ba projetu ne’e komesa tinan 2021 atu bele adapta ho situasaun mundu ohin loron nian. Ha’u hakarak agradese ba VIII governu konstituisionál lideradu Primeiru Ministru Taur Matan Ruak no Ministru Prezidensia Konsellu Ministru Fidelis Leite Magalhães tanba sira aselera prosesu to’o ami asina akordu espesiál investimentu iha loron 03 fulan Janeiru,” nia haktuir.

Hafoin asina akordu Pelican Paradise aselera prosesu hotu-hotu no garante katak iha fulan Juñu tinan ne’e, dezeñu sira sei remata no iha fulan Novembru Pelican Paradise bele ona hahú servisu konstrusaun sira atu bele aselera prosesu hotu tuir espetativa ne’ebé empreza iha.

“Projetu ne’e la’o kleur liu tanba empreza Pelican Paradise hasoru problema administrasaun no foin iha tinan ne’e mak ami ho governu asina akordu investimentu espesiál,” nia esplika.

Alem de prosesu administrasaun ne’ebé han tempu naruk ida seluk mak tanba projetu ne’e boot tebes tanba ne’e presiza dunik tempu atu tetu buat hotu ho di’ak husi Governu liuliu iha aspetu sira liga ho lisensamentu ambientál, rai no sira seluk maibé oras ne’e prosesu hotu remata ona no parte Pelican Paradise prontu ona atu hahu konstrusaun iha tinan ne’e.

Jornalista: Vito Salvadór