Ricardo Nheu, Prezidente Partidu Frenti-Mudança períodu 2022-2027

Hatutan.com, (29 Maiu 2022), Díli– Partidu Frenti-Mudança liu husi kongresu nasional bá datoluk, hili Ricardo Cardoso Nheu nu’udár Prezidente partidu hodi troka José Luis Guterres “Lugu” bá períodu 2022-2027.

Lee Mós : Horta Husu Frenti-Mudança Kontribui Bá Dezenvolvimentu Nasionál

Ricardo Cardo Nheu, prezidente partidu Frenti-Mudança períodu 2022-2027. Foto/Hatutan.com

Pozisaun vise-prezidente na’in-rua; Julio Soares Madeira ho Manuel Gama. Nune’e, Sekretáriu Jerál Daniel Pereira, vise Sekretáriu Jerál Anselmo Ximenes ho Isabel Ximenes.

Kongresu nasionál partidu Frenti-Mudança ne’ebé realiza durante loron-tolu, 27 to’o 29 fulan-Maiu, iha Salaun Laline Larigutu, CNE, Díli, ho Tema Nasional: Hametin no Haforsa Partidu Frenti-Mudança hodi Servi Di’ak-liu Povu Timor Leste. Ho Sub tema: Promove Desizaun Koletiva, Konsolida Atividade Ekonómia Nasional hodi Hametin Partidu Frenti-Mudança.

Partisipa iha kongresu nasional ne’e kongresista sira mai husi munisípiu 12 no Rejiaun Administrativu Espesiál Oé-Cusse Ambeno (RAEOA) ho total delegadu na’in-298.

Husi delegadu hirak-ne’e hamosu pakote rua bá kompete lideransa iha kongresu ne’e no hetan verifikasaun husi meza verifikasaun no podér atu asegura labele mosu dupla proponente iha kada pakote.

Pakote A: Konselleiru Abel Ximenes “Larisina”, Cesar Vital Moreira no Prezidente Ricardo Cardoso Nheu ho Sekretáriu Jerál Daniel Pereira. Totál proponente 203 no Vise-prezidente rua; Julio Soares Madeira ho Manuel Gama, Vise Sekretáriu Jerál maka Anselmo Ximenes no Isabel Ximenes.

Enkuantu Pakote B ne’ebé delegadu proponente sira propoin bá Prezidente partidu Frente-Mudança Cesar Vital Moreira, mas deside retira nia kandidatu hodi fó oportunidade bá pakote A avansa mesak atu kongresista sira hili.

Pose bá estrutura partidu Frenti-Mudança períodu 2022-2027. Foto/Hatutan.com

Ho rezignasaun ne’e, komisaun ne’ebé lidera mzsa kongresu hamutuk ho komisaun jurisdisaun no podér partidu nia deside hakat bá eleisaun ho forma sekretu no demokratiku atu kongresista sira nafatin hili ho konsiénsia.

Rezultadu votasaun hatudu pakote  ne’ebé lidera husi prezidente partidu Ricardo Cardoso Nheu ho nia estrutura hetan votu afavór 247, la konkorda 20 no branku rua (2) enkuantu delegadu hamutuk 49 la ezerse sir- nia direitu votu.

Hafoin eleitu prezidente Partidu Frenti-Mudança, Ricardo Cardoso Nheu hateten, sei prepara kuadru partidu nian no konsolida partidu bá too iha baze atu enfrenta situasaun sira ne’ebé iha no liuliu oinsá lori Frenti-Mudança bá enfrenta eleisaun parlamentár  2023.

Nia afirma partidu nu’udár eskola ida atu prepara kuadru no militante sira ne’ebé di’ak no iha kualifikasaun hodi serbí nasaun ne’e. Partidu nia ema sira tenke iha kompromisu atu servisu hodi serbírai ne’e ho di’ak.

“Ami sei kaer metin doutrina haat hanesan defende lia loos, haboot espíritu kamaradazen, aprende no ida ikus liu mak pratika bá moris di’ak,” Ricardo Nheu Hateten.

Iha fatin hanesan, Konselleiru Nasional Partidu Frentei-Mudansa, Abel  Ximenes “Larisina”, hateten durante kongresu la’o iha difikuldade no dezafiu lubuk ne’ebé partidu Frenti-Mudança enfrenta, maibé ne’e hotu hanesan motivasaun ida atu partidu ne’e kontinua hakat bá oin.

Nia afirma objetivu ikus liu husi kongresu nasional ne’e mak atu hili estrutura nasionál ne’ebé sei sai hanesan komandu atu lori partidu ne’e durante mandatu ne’ebé kongresista sira fó liu husi eleisaun ne’ebé asembleia halo.

“Ami-nia estrutura ne’e halo partidu Frenti-Mudança sei metin liután no sei fó partisipasaun bá dezenvolvimentu nasional,” Abel “Larisina” hateten.

Hanesan partidu ne’ebé iha tinan hira ikus ne’e hasoru dezafiu barak Frenti-Mudança iha kompromisu ida atu nafatin serbisu, iha kooperasaun hodi atinje objetivu ne’ebé partidu iha.

Ba oin Frenti-Mudança sei tau prioridade bá investimentu iha rekursu umanu atu bele lori militante sira-nia moris liu husi kooperativa ne’ebé partidu sei estabelese ho rekursu rasik.

Estrutura eleitu hetan pose husi Prezidente komisaun jurisdisaun partidu Frenti-Mudança José Pereira da Conceição no asiste direita husi delegadu no delegada sira.

Partisipa iha serimónia pose bá estrutura nasionál partidu Frenti-Mudança períodu 2022-2027 ne’e prezidente partidu PST, Sekretáriu Jerál partidu UDT no konvidadu onra seluk ne’ebé sai partidu Frente-Mudança nia parseria.

Jornalista: Vito Salvador