FFTL Orgullu Klube Europa iha Interese Kontrata Gally Freitas

Hatutan.com, (30 Maiu 2022), Díli- Prezidente Federasaun Futeból Timor Leste (FFTL), Francisco Martins da Costa Pereira Jerónimo, orgullu ho prestasaun jogadór timoroan Paulo Gally Freitas, ne’ebé oras ne’e klube futeból lubuk ida iha Europa hakarak kontrata nia.

Lee Mós : FFTL Rekoñese Performa Timor-Leste iha Sea Games “Monu”

Jogadór selesaun nasionál, Paulo Gally Freitas. Foto/Espesiál

Prezidente FFTL, Francisco Martins da Costa Pereira Jerónimo hateten, iha klube lubuk iha Europa mak iha interese atu kontratu jogadór selesaun nasionál Timor-Leste, Paulo Gally Freitas, maibé to’o oras ne’e seidauk iha serteza tamba Gally sei kontinua halo trial ho klube sira ne’ebé iha interese bá nian.

Bainhira husik hela selesaun nasionál no família iha Timor-Leste Gally hetan uluk kontaktu ho klube España ida ne’ebé joga iha kuarta divizaun liga España ho naran Antequnas Fc, maibé hafoin trial klube refere deside la halo kontratu ho Gally ho razaun balun ne’ebé iha no oras ne’e Gally iha  Portugal hodi kontinua halo trial ho klube balun iha Portugal.

“Ha’u hatene katak iha klube tolu ka haat  mak hakarak kontratu ita-nia jogadór Paulo Gally iha Europa,” Francisco Martins da Costa Pereira Jerónimo haktuir bá jornalista sira hafoin hasoru malu Primeiru-Ministru (PM) Taur Matan Ruak iha Farol, Díli, Segunda (30/05/2022).

Timor-Leste laiha ajénsia ka agen ba futeból profesionál, nune’e FFTL rasik halo meius liu husi produsaun profile jogadór sira nian hodi halo promosaun bá li’ur, luiliu bá klube sira iha Europa atu sira mós bele koñese no hahú fihir fini futebolista timoroan ne’ebé iha abilidade no talenta.

Prezidente FFTL ne’e husu atu jogadór selesaun nasionál sira ne’ebé uainhira hetan oportunidade selebra kontratu ho klube estranjeiru ruma tenke mantein disiplina hodi hatudu kapasidade, liuliu abilidade hanesan futebolista nasionál ne’ebé kualifikadu atu kompete ho jogadór husi rai-seluk.

Jornalista: Vito Salvador