Hatutan.com, (30 Maiu 2022), Díli- Ministra Negósiu Estranjeiru no Kooperasaun (MNEK), Adaljiza Magno informa Ministru Negósiu Estranjeiru Xina, Wang Yi sei vizita Timor Leste hodi asina akordu bá hametin relasaun bilaterál entre TL ho Xina.
Ministra Negósiu Estranjeiru no Kooperasaun (MNEK), Adaljiza Magno. Foto/Hatutan.com
MNE Wang Yi sei vizita Timor-Leste iha loron 03 to’o loron 04 fulan-Juñu 2022 no tuir ajenda sei hasoru malu mós ho Prezidente Repúblika José Manuel Ramos-Horta, Primeiru-Ministru (PM), Taur Matan Ruak no mós entidade seluk ne’ebé Ministru Wang Yi hakarak hasoru.
MNEK Adaljiza Magno bá jornalista sira hafoin hasoru malu ho Primeiru-Ministru (PM) Taur Matan Ruak, iha rezidénsia ofisial Faról, Díli, Segunda (30/05/2022), informa sorumutuk ho Xefe Governu ne’e atu informa kona-bá vizita Ministru Negósiu Estranjeiru Xina, Wang Yi mai iha Timor-Leste.
Sorumutuk ne’e mós atu briefing ho Xefe Governu kona-bá preparativus sira no protokolu tamba liu husi vizita ne’e Governu no estadu Xina iha kompromisu boot atu hametin liután relasaun bilateral entre país rua.
Advertisement
“Ita sei selebra ka asina hamutuk akordu sira kona-bá servisu aero, Air Service Agreement (ASA), akordu Ekonómiku liuliu ba iha kooperasaun área agrikultura no bee-moos, akordu kona-bá apoiu médiku husi Xina mai Timor-Leste. Alem de ida-ne’e, sei asina mós akordu kona-bá apoiu bá RTTL, E.P,” Adaljiza Magno hateten.