Hatutan.com (01 Juñu 2022), Díli-Bazeia bá rezultadu ka prova dokumentu no sasin sira bá kazu projetu instalasaun Set-top Box/desodificador Rádiu Televizaun Timor Leste, Empreza Públiku (RTTL,E.P), Komisaun Anti-Korrupsaun (CAC, sigla portugés) identifika ona arguidu na’in-haat mak involve direta iha projetu instalasaun Set-top Box/dexodificador RTTL,E.P ne’e.
Set-top Box/dexodificador RTTL,E.P ne’ebé rai de’it iha Sede Vila Verde, Dili, 26 Janeiru 2022. Foto/Hatutan.com
Maske nune’e, rezultadu investigasaun iha hela Komisáriu CAC, Sergio Hornai nia meza leten hodi halo apresiasaun no asina termu remesa molok submete bá Ministériu Públiku (MP) antes loron lima nia laran.
“Prosesu investigasaun remata ona no husi rezultadu ne’e faktu hatudu iha indísiu arguidu hamutuk na’in-haat maka involve iha prosesu refere, maibé kona-bá inisiál arguidu sira-nian to’o iha akuzasaun maka foin hatene no ha’u labele fó sai inisiál tanba daudaun ne’e iha ona planu no ezbosu relatóriu atu haruka bá MP karik sei iha tan pedidu kontinuasaun bá atuasaun polisiál balun,” Diretór Jerál Investigasaun CAC, José Verdial informa bá Hatutan.com iha Díli, Kuarta (01/06/2022).
Advertisement
Tuir konkluzaun jurídiku CAC nian bá kazu ne’e, iha indísiu bá krime haat maka hanesan abuzu de podér, partisipasaun ekonomia iha negósiu, konflitu de interese no burla agravada.
Projetu instalasaun Set-top Box/dexodificador RTTL,E.P ne’e ho nia kustu $900,000.00, deskonfia Ministru Asuntu Parlamentár no Komunikasaun Sosiál (MAPKOMS), Francisco Martins da Costa Pereira Jerónimo, nudár mós Prezidente Federasaun Futeból Timor Leste (FFTL) estabelese kontratu ho empreza DILI ETERNAL INNOVATION INFORMATION, Lda nudár sósiu husi Melánia da Silva Fernandes Capela nu’udár Sekretaria iha Gabinete Prezidente FFTL.