Hatutan.com (01 Juñu 2022), Díli—Konsellu Ministrus hala’o sorumutuk iha auditóriu Ministériu Finansas, iha Dili, no aprova ona Proposta Rezolusaun Parlamentu Nasionál ne’ebé ratifika Emenda Doha nian ba Protokolu Quioto, ne’ebé aprezenta hosi Ministra Negósius Estranjeirus no Kooperasaun, Adaljiza Albertina Xavier Reis Magno. Protokolu Quioto ne’e maka tratadu internasionál ida iha ne’ebé nasaun sira ne’ebé asina akordu ne’e halo kompromisu hodi hamenus sira-nia emisaun gas ida-idak ne’ebé halo efeitu estufa iha atmosfera. Emenda Doha ba Protokolu ne’e mós hanesan kontributu importante ida hasa’e konsiénsia no mobilizasaun kona-ba nesesidade no ezijénsia ba esforsu boot ida nivel globál nian hodi kombate alterasaun klimátika sira, liuliu liuhosi hamenus emisaun gas ne’ebé halo efeitu estufa porsentu 5, iha média. Emenda neé ratifika ona hosi nasaun 147.
Reuniaun KM. Foto/media KM.
Konsellu Ministrus delibera hodi autoriza Ministru Transportes no Komunikasaun, José Agustinho da Silva, atu negosia Akordu ida Servisu Aéreu nian sira entre Governu Repúblika Populár Xina no Governu Repúblika Demokrátika Timor-Leste.
Konsellu Ministrus delibera hodi fó podér tomak ba Ministru Koordenadór Asuntus Ekonómikus, Joaquim Amaral, hodi asina Akordu Kooperasaun Ekonómika no Téknika entre Governu Repúblika Populár Xina no Governu Repúblika Demokrátika Timor-Leste.
Advertisement
Konsellu Ministrus delibera mós hodi fó podér tomak ba Ministra Saúde, Odete Maria Freitas Belo, hodi asina Akordu ida iha área Saúde nian entre Governu Repúblika Populár Xina no Governu Repúblika Demokrátika Timor-Leste.
Konsellu Ministrus delibera mós hodi fó podér tomak ba Ministru Asuntus Parlamentares no Komunikasaun Sosiál, Francisco Martins da Costa Pereira Jerónimo, hodi asina akordu ida ho Administrasaun Rádiu no Televizaun Nasionál Repúblika Populár Xina.
“Konsellu Ministrus delibera mós hodi fó podér tomak ba Ministru Asuntus Parlamentares no Komunikasaun Sosiál, Francisco Martins da Costa Pereira Jerónimo, hodi asina akordu ida entre Governu Repúblika Populár Xina no Governu Repúblika Demokrátika Timor-Leste ba kontinuasaun prosesu dijitalizasaun Rádiu no Televizaun Timor-Leste no ba faze daruak projetu televizaun dijitál Terrestre,” Hatutan.com sita Komunikadu.
Konsellu Ministrus aprova projetu dekretu-Lei kona-ba altersaun Dahuluk ba Dekretu-Lei nu. 16/2004, loron 1 fulan-outubru, ne’ebé aprova ona Lei Kooperativa nian sira, ne’ebé aprezenta hosi Ministru Koordenadór Asuntus Ekonómikus, Joaquim Amaral. Ho alterasaun dahuluk ba Dekretu-Lei ne’e, introdús ona alterasaun balu ne’ebé bele sai nu’udar insentivu ida ba setór ne’e, tanba kooperativa sira importante tebes ba dezenvolvimentu ekonómiku Nasaun nian.