Xefe Estadu Simu Ona Relatóriu Diretiva Ministeriál Planeamentu Militár

Hatutan.com (02 Juñu 2022), Díli— Ministru Defeza, Filomeno da Paixão de Jesus, entrega ona relatóriu kona-bá diretiva ministeriál planeamentu militár ne’ebé halo iha 2019 bá Prezidente Repúblika, José Manuel Ramós-Horta.

Ministru Defeza, Filomeno da Paixão de Jesus, entrega relatóriu kona-bá diretiva ministeriál planeamentu militár ne’ebé halo iha 2019 bá Prezidente Repúblika, José Manuel Ramós-Horta, Kuarta (01/06/2022). Foto/Média PR.

Filomeno Paixão simu órden hosi Primeiru-Ministru (PM), Taur Matan Ruak, atu hasoru Prezidente Repúblika, José Ramós-Horta hodi relata kona-bá situasaun ne’ebé la’o iha Ministériu Defeza no FALINTIL Forsa Defeza Timor-Leste (F-FDTL).

Lee Mós: Dezenvolvimentu Komponente CFT Depende ba Disiplina Militár

“Ha’u informa bá Prezidente kona-bá diretiva ministerial de planeamentu militár halo iha 2019, iha ne’ebá hateten hotu, bá iha VIII governu konstitusionál nia vigora ne’e ha’u tenki halo saida,” Filomeno Paixão  hateten iha Palásiu Prezidensiál Nicolau Lobato, Kuarta (01/06/2022).

Tanba ne’e, komesa fó servisu bá diresaun jerál aprovizionamentu, administrasaun finansas, halo servisu ninian, bá diresaun polítika internasionál nian ho kooperasaun nian halo saida.

Sira halo servisu saida komesa iha 2018 to’o 2023 tenki aprezenta servisu saida-saida bá Estadu, no hanesan Ministru labele ko’alia detallu liu, tanba relatóriu eskritu  entrega hotu bá Prezidente Repúblika.

Diresaun polítika internasionál ho kooperasaun internasionál, atu husu apoiu kooperasaun, kolaborasaun no asisténsia téknika bá nasaun doadores 20-resin.

Xefe Estadu husu Ministru Defeza, atu kontinua servisu hamutuk ho nasaun boot sira, liu-liu Estadu Amerikanu, Estadu Xinés, Estadu Australianu, Estadu Portugués, nune’e haki’ak nafatin kooperasaun hodi haruka nafatin membru sira atu bá estuda iha estranjeiru.

Jornalista: Vito Salvadór