PN Aprova Proposta “Lei das Grandes Opções do Plano 2023” iha Finál Globál

Hatutan.com (04 Juñu 2022), Díli—Parlamentu Nasionál (PN) liuhosi sesaun Plenária Estraordináriu loron Sesta (03/06/2022), aprova ona iha finál globál Proposta Lei das Grandes Opções do Plano 2023 ho 42 votu a favor, 18 kontra no 2 abstensaun.

Parlamentu Nasionál (PN) liuhosi sesaun Plenária Estraordináriu loron Sesta (03/06/2022), aprova ona iha finál globál Proposta Lei das Grandes Opções do Plano 2023 ho 42 votu a favor, 18 kontra no 2 abstensaun. Foto/Média MF.

Grandes Opções do Plano 2023 kontein medidas ka atividades prinsipál hamutuk 263 liu hosi Programas 45 iha área estratéjiku 16 ne’ebé Governu sei foku iha tinan oin.

Lee Mós:Governu Submete Lei Planu Opsaun Prinsipál 2023 ba PN

“Proposta Lei GOP inklui estimasaun orsamentu multi anuál hahú hosi 2023 to’o 2027 nomós tetu agregadu ba OJE 2023 ho montante billiaun $3,15 ne’ebé sei aloka ba Administrasaun Sentrál billiaun $2,8, RAEOA millaun $120, no Seguransa Sosiál millaun $235,7,” Hatutan.com sita Komunikadu.

Despeza Globál aprovadu ba OJE 2023 hamutuk billiaun $3,15. Ida-ne’e signifika iha redusaun 8% hosi OJE Retifikativu 2022 ne’ebé nia montante totál $3.419.539.539.

Ho aprovasaun hosi Parlamentu Nasionál ne’e mak Governu konklui ona Faze Planeamentu – faze dahuluk hosi prosesu elaborasaun OJE 2023 tuir espíritu Lei Foun Enkuadramentu Orsamental. Tuir-mai Governu sei kontinua ba Faze Preparasaun Orsamentu ne’ebé sei hahú ho Reuniaun Anuál entre Governu no Parseirus Dezenvolvimentu (TLDPM) ne’ebé sei realiza iha loron 10 fulan-juñu molok hakat ba Jornada Orsamentál iha loron 30 fulan-juñu 2022.

Ba oin, Komisaun C ne’ebé trata asuntu Finansas Públikas, Parlamentu Nasionál no Governu sei finaliza redasaun finál molok haruka Diploma ne’e ba Gabinete Prezidénsia Repúblika hodi entrega ba Prezidente Repúblika José Manuel Ramos-Horta atu tetu.

Sesaun Plenária Estraordináriu ne’e prezide hosi Prezidente Parlamentu Nasionál, Aniceto Longuinhos Guterres Lopes, akompaña hosi membrus Meza Parlamentu Nasionál ho prezensa hosi Primeiru-Ministru, Jenerál Taur Matan Ruak, Ministru Finansas, Rui Gomes, inklui Membrus Oitavu Governu Konstitusionál. Ministru Rui Gomes hetan akompañamentu hosi Diretores-Gerais, Diretores Nacionais no Tékniku sira hosi Ministériu Finansas.

𝗞𝗮𝗹𝗲𝗻𝗱𝗮́𝗿𝗶𝘂 𝗘𝗹𝗮𝗯𝗼𝗿𝗮𝘀𝗮𝘂𝗻 𝗢𝗝𝗘 𝟮𝟬𝟮𝟯 𝗯𝗮𝘇𝗲𝗶𝗮 𝗯𝗮 𝗟𝗲𝗶 𝗘𝗻𝗸𝘂𝗮𝗱𝗿𝗮𝗺𝗲𝗻𝘁𝘂 𝗢𝗿𝘀𝗮𝗺𝗲𝗻𝘁𝗮𝗹

✅ 2-3 Juñu: Parlamentu Nasional diskute no aprova Lei das Grandes Opções do Plano

✅ 10 Juñu: Timor-Leste Development Partners Meeting (TLDPM)

✅ 30 Juñu: Jornada Orsamentál

✅ 15 Jullu: Konsellu Ministrus aprova Tetu Desagregasaun Orsamentu

✅ 20 Jullu: MF fó sai Sirkulár preparasaun OJE 2023 no Distribuisaun Tetu Desagregadu

✅ 17 Agostu: Konsellu Ministrus aprova alokasaun orsamentu tuir Programa

✅ 15 Setembru: Konsellu Ministrus aprova Proposta Lei OJE 2023

✅ 01 Outubru: Governu aprezenta Proposta Lei OJE 2023 ba PN

✅ Novembru: Diskusaun Proposta OJE 2023 iha PN

✅ 15 Novembru: Votasaun Proposta OJE 2023 iha PN

✅ Dezembru: Prezidente Repúblika promulga Lei OJE 2023

✅ Dezembru: Publikasaun Lei OJE 2023 iha Jornal da Repúblika.

Jornalista: Rogério Perreira Cárceres