Estadu Presiza Aselera Ratifikasaun Konvensaun Internasionál Direitu Bá Ema ho Defisiénsia

Hatutan.com, (15 Juñu 2022), Díli- Plataforma Nasional Ema ho defisiensi hamutuk ho organizasaun sosiedade sivil sira ne’ebé luta ba direitu umanu no direitu ema ho difisiensia ejize atu Governu no Parlamentu Nasionál aselera ratifikasaun Konvensaun Internasionál Direitu ba Ema ho Difisiensia (KIDED).

Lee Mós : Governu Tenke Prepara Kondisaun ba Ema ho Defisiénsia iha Eleisaun

Porta vós plataforma nasionál no Prezidente Ezekutivu Raes Hadomi Timor Oan (RHTO), Joãzito dos Santos. Foto/Hatutan.com

Porta vós plataforma nasionál no Prezidente Ezekutivu Raes Hadomi Timor Oan (RHTO), Joãzito dos Santos, Kuarta (15/06/2022), hasoru malu ho Prezidente Repúblika (PR), José Manuel Ramos-Horta, iha Palásiu Prezidensiál, hodi husu apoiu moral no polítika Prezidente Repúblika nian, atu bele ko’alia ho órgaun Estadu seluk hodi dudu lalais retifikasaun konvensaun internasionál bá direitu ema ho defisiénsia.

Prezidente Repúblika mós konkorda no konsidera presiza tebes atu aselera ratifikasaun konvensaun internasionál direitu bá ema ho defisiénsia liga ho situasaun direitu umanu hanesan asesibilidade bá bee-moos tamba ema ho defisiensia liliu inan-feton sira ne’ebé sei bá kuru-bee ho distansia dok tebes no dalaruma sei hetan violasaun oin-oin.

Prezidente Repúblika  ho sériu tebes bá asuntu konvensaun internasionál bá direitu ema ho defisiénsia. Nune’e, Ramos-Horta promete sei haruka nota ida bá órgaun kompetente sira hodi haree asuntu nee ho lalais no sériu.

Konvensaun ida ne’e hanesan dokumentu ka tratadu internasionál ida, ne’ebé obriga Governu hala’o ninia knaar no responsabilidade atu ratifika konvensaun ne’e hodi garantia ema ho defisiénsia nia direitu.

Tuir dadus sensus uma-kain 2015 númeru ema ho defisiensia atinje 38.128 no tuir relatóriu demografi health survey hatudu katak númeru ema ho defisiénsia atinze 50.000 iha Timor-Leste.

Jornalista: Vito Salvador