KM Aprova Projetu Dekretu-Lei Rejime Jurídiku Estabelesimentu Ensinu Superiór

Hatutan.com (15 Juñu 2022), Díli—Konsellu Ministru (KM) aprova ona projetu Dekretu-Lei ne’ebé aprova rejime jurídiku ba estabelesimentu sira ensinu superiór nian, aprezenta hosi Ministru Ensinu Superiór, Siénsia no Kultura, Longuinhos dos Santos.

Reuniaun Konsellu Ministru (KM), Kuarta (15/06/2022). Foto/Media PM.

Projetu Dekretu-Lei ida-ne’e ninia objetivu mak atu hadi’a aspetu oioin hosi atuál Rejime Jurídiku ba Estabelesimentu Ensinu Superiór (RJEES) nian, ne’ebé estabelese hosi Dekretu-Lei n. 8/2010, loron 19 fulan-maiu.

Lee Mós:Reuniaun KM Delibera no Fó Podér ba Ministru Na’in-Haat Asina Akordu ho Xina

“Entre alterasaun sira ne’ebé introdús, destaka aplikasaun konkreta hosi rejime jurídiku kurríkulu padraun nasionál nian ba ensinu superiór, ne’ebé tama ona iha vigór iha Timor-Leste liuhosi Dekretu-Lei n. 3/2022, loron 12 fulan-dezembru no konsolidasaun konseitu bináriu sistema ensinu superiór nian,” Hatutan.com sita komunikadu.

Aleinde ida-ne’e, introdús ona norma sira kona-bá asosiativismu estudantíl nian, kona-bá antigu estudante sira, kona-bá apoiu ba estudante sira iha ninia insersaun iha vida ativa no kona-bá figura provedór estudante nian.

Nune’e mós introdús regra sira kona-bá fuzaun, fahe ka transferénsia estabelesimentu sira ensinu superiór privadu nian, kona-bá rekoñesimentu interese públiku hosi estabelesimentu sira ensinu superiór no kona-bá fiskalizasaun no inspesaun ba instituisaun sira ensinu superiór nian.

Konsellu Ministru aprova ona projetu Proposta-Lei, ne’ebé aprezenta hosi Primeiru-Ministru, Taur Matan Ruak, halo renovasaun daruak ba medida exesionál no temporária ba vijilánsia sanitária hodi hatán ba pandemia moras COVID-19 nian, ne’ebé prorroga vijénsia hosi artigu da-3 Lei n. 24/2021 nian, loron 19 fulan-novembru. Ho alterasaun ida-ne’e, medida exesionál sira ne’e prorroga ba periodu loron 120.

Ikusliu, Konsellu Ministru apresia ona aprezentasaun ida kona-bá Prosesu no Roteiru ba rekrutamentu profesór sira, ne’ebé aprezenta hosi Ministru Edukasaun, Juventude no Desportu, Armindo Maia.

Aprezentasaun ida-ne’e inklui informasaun ruma kona-bá númeru profesór sira ne’ebé iha no previzaun kona-bá rekrutamentu iha tempu badak.

Jornalista: Rogério Pereira Cárceres