Ministru Justisa Vizita Pertamina Internasionál Antes Asina Kontratu Arrendamentu Terrenu

Hatutan.com (15 Juñu 2022), Díli—Ministru Justisa (MJ), Tiago Amaral Sarmento hala’o vizita ba Pertamina Internasionál iha Praia dos Coqueiros Dili,  hodi haree direta sistema seguransa no haree oinsa bainhira mosu Inséndiu ruma  iha esteriór, oinsa protéje an.

Ministru Justisa (MJ), Tiago Amaral Sarmento hala’o vizita ba Pertamina Internasionál iha Praia dos Coqueiros Dili, hodi haree direta sistema seguransa no haree oinsa bainhira mosu Inséndiu ruma iha esteriór, oinsa protéje an, Kuarta (15/06/2022). Foto/Média MJ.

“Alende ne’e bainhira iha asidente ruma hosi laran karik, oinsa sira bele protéje viziñuu sira hosi situasaun ne’e,” Hatutan.com sita komunikadu, Kuarta (15/06/2022).

Lee Mós:Pertamina Hetan Tratamentu Espesiál, Ramos-Horta Sei Haruka Nota Bá Governu “Hasai” Husi Pantai Kelapa

Kona-bá Prezidente Repúblika (PR) José Manuel Ramos-Horta nia deklarasaun atu Urjentemente muda Pertamina ne’e ba Fatin seluk, Ministru Justisa dehan, PR hanesan Xefe Estadu preokupa tanba kestaun seguransa, ne’e normál.

Tanba ne’e maka, Ministru Justisa hakarak ba hodi haree direta Pertamina Internasional Timor SA nia sistema seguransa no buka hatene oinsa atu prevene no oinsa atu rezolve bainhira mosu insendu ruma.

Hafoin halo observasaun ba Pertamina Internasionál Timor SA, Ministru Justisa sei tetu kestaun seguransa ba inséndiu bainhira atu asina kontratu arrendamentu ho Pertamina Internasionál Timor Sa ka koñesidu ho Pertamina Indonézia.

Jornalista: Rogério Pereira Cárceres