Nasionál
PM Taur Matan Ruak Dezloka ba Singapura Hodi Hala’o Tratamentu Saúde
Hatutan.com, (15 Juñu 2022), Díli—Primeiru-Ministru (PM) Taur Matan Ruak, kuarta ohin dezloka ba Singapura hodi hala’o tratamentu saúde iha Mount Elizabeth Novena Hospital.
Primeiru-Ministru (PM) Taur Matan Ruak, kuarta ohin dezloka ba Singapura hodi hala’o tratamentu saúde iha Mount Elizabeth Novena Hospital, ho Batik Air. Foto/Média PM.
Dezlokasaun hodi hala’o tratamentu ne’e bazeia ba rekomendasaun hosi médiku Ospitál Nasionál Guido Valadares (HNGV) nian.
“Durante pandemia Covid-19, Xefe Governu hala’o de’it check-up iha HNGV Díli, tanba ne’e, médiku HNGV rekomenda atu Xefe Governu presiza ba tratamentu saúde iha Ospitál mais avansadu atu médiku espesialista sira bele kontrola di’ak nia kondisaun saúde, ne’ebé kauza mai hosi konsekuénsia tinan 24 gerilla iha aí-laran ho kondisaun la favorável,” Hatutan.com sita komunikadu.
Durante hala’o tratamentu saúde iha rai li’ur, Vise Primeira-Ministra, Armanda Berta dos Santos mak sei asumi pasta interinamente ba Xefe Governu.
Xefe Governu sei fila fali mai rai laran iha loron 29 fulan-juñu tinan 2022.
Jornalista: Rogério Pereira Cárceres