Manatuto
Ramos-Horta Transmite Populasaun Kribas Nia Susar Bá IGE Atu Konsidera
Hatutan.com, (15 Juñu 2022), Díli-Prezidente Repúblika nu’udár mós Xefe Estadu presiza duni atu sai mós hanesan matan, tilun no ibun povu nian. Ho nune’e, Ramos-Horta, hala’o papel ka knar ida-ne’e hodi sai mós matan, tilun ho ibun bá povu sira hodi transmite povu nia halerik no susar bá órgaun kompetente Estadu nian atu bele tau konsiderasaun.
Prezidente Institutu Jestaun Ekipamentu (IGE, sigla portugés), Hermenegilda da Costa. Foto/Hatutan.com
Iha Kuarta (15/06/2022), Prezidente Repúblika, José Manuel Ramos-Horta, halo sorumutuk ida ho Prezidente Institutu Jestaun Ekipamentu (IGE, sigla portugés), Hermenegilda da Costa, hodi transmite populasaun Kribas nia susar bá IGE atu bele tau nota ka atensaun.
Lori komunidade Kribas, Munisípiu Manatuto, Ramos-Horta, husu IGE atu apoiu hadi’a estrada ligasaun Suku Kribas bá aldeia Camedar, Suku Barique, Postu Administrativu Natarbora, Munisípiu Manatuto.
Hermenegilda da Costa hateten, enkontru ho PR atu informa kona-bá servisu sira ne’ebé IGE halo durante tempu inundasaun, liuliu bá iha normalizasaun mota no estrada sira ne’ebé hetan destruisaun kauza husi inundasaun no dezastre natural ne’ebé iha.
IGE hanesan Institutu Públiku no tutela bá iha Ministériu Obras Públiku (MOP) tamba ne’e PR husu atu nafatin halo servisu hodi kontinua apoiu komunidade, liuliu iha parte estrada nian.
Ramos-Horta mós husu atu parte IGE tau atensaun hodi hadi’a kondisaun estrada husi Suku Kribas, postu administrativu Manatuto Vila ligasaun bá Suku Barique Antigu, Aldeia Camedar, Postu Administrativu Natarbora, Munisípiu Manatuto.
Relasiona ho dalan ligasaun Kribas bá Camedar iha ona pedidu, nune’e iha tempu badak, sei orienta bá iha Xefe departamentu no diretór ezekutivu para oinsá orienta enjeñeiru sira atu koordena ho autoridade sira iha terrenu hodi foti dadus. Nune’e IGE bele hatene presiza mákina pezadu hira no tipu mákina saida-saida de’it mak presiza destaka ba iha fatin refere.
Tuir relatoriu ne’ebé IGE relata ba MOP no Ministériu Finansas hatudu katak iha trimestral dahuluk, tinan ne’e, IGE liu husi servisu ba normalizasaun mota, dalan no loke dalan foun sira iha munisípiu hotu konsege halo poupansa bá osan estadu hamutuk $500,000-liu.
Jornalista: Vito Salvador