Weststar Aviation Prontu Fasilita Transporte Aéreu Bá Servisu Petrolíferu iha TL

Hatutan.com, (15 Juñu 2022), Díli- Empreza Weststar Aviation husi Indonéziu sei halo investimentu iha setór aviasaun hodi tulun empreza petrolíferu sira ne’ebé sei halo servisu petrolíferu iha Timor-Leste.

Diretór empreza Weststar Aviation Indonézia, Suardi M. Panua. Foto/Hatutan.com

Diretór empreza Weststar Aviation Indonézia, Suardi M. Panua, hafoin hasoru malu ho Prezidente Repúblika, José Manuel Ramos-Horta iha Palásiu Prezidensiál, Díli,  Kuarta (15/06/2022), hateten, Weststar Aviation Indonézia nu’udár empreza charter ne’ebé sei prepara elikópteru  bainhira empreza petrolíferu sira hahú halo opersaun servisu offsour iha Kosta Súl, Timor-Leste no karik ida ne’e bele akontese iha tinan oin.  

Weststar Aviation Indonézia mai iha Timor-Leste atu partisipa hamutuk ho empreza petrolíferu sira iha Timor-Leste hodi dezenvolve bussines ka negósiu petrolíferu iha Timor-Leste.

Nia afirma bainhira Weststar Aviation Indonézia servisu kleur ona iha Timor-Leste ho tempu ne’ebé kleur, maka empreza privadu ne’e mós iha ona hanoin oinsá bele dezenvolve no tulun foin-sa’e sira bele sai hanesan pilotu no mós enjeñeiru iha área petrolíferu.

“Weststar Aviation Indonézia iha kompromisu boot atu tulun fó treinamentu bá joven sira, maibé ba dahuluk ami tenke iha uluk lai servisu iha Timor-Leste, atu nune’e, timoroan sira bele iha oportunidade atu lori aviaun elikópteru ne’ebé empreza iha,” Suardi M. Panua hateten.

Weststar Aviation husi Indonéziu prontu investe iha TL. Foto/Espesiál

Weststar Aviation Indonézia hahú set-up atu iha servisu hamutuk ho empreza nasionál timoroan nian hanesan Weststar Gap Aviation.

Weststar Aviation Indonézia halo de’it charter bá traballadór empreza petrolíferu sira no sei la halo atendimentu bá públiku tamba servisu ne’ebé West Star Aviation Indonézia sei halo ne’e konsideradu espesial.

Sorumutuk entre  Weststar Aviation Indonézia  ho Prezidente Repúblika ne’e troka mos ideia ho kona-bá dezenvolvimentu ekonomia, agrikultura, no dezenvolvimentu rekursu umanus, maibé jerálmente foka liubá ekonomia.

Jornalista: Vito Salvador