Hatutan.com, (16 Juñu 2022), Díli-Polisia Nasional Timor-Leste (PNTL), Unidade Servisu Investigasaun Kriminál Nasionál (SIKN), Kinta (16/06/2022), tuku 06:00, dadeer, halo ona detensaun bá autór sidadaun estranjeiru ida ho inisiál RTF iha rezidénsia privadu ida iha área Dili laran.
Ilustrasaun Stop Human Trafficking. Foto/Google
Sidadaun estranjeiru ne’e deskonfia involve iha krime tráfiku umanu no abuzu seksuál hasoru vítima feto ida ne’ebé mak sei maioridade.
Prosesu sira kona-bá Buska Domisiliáriu no Apreensaun ne’e akontese tanba SIKN ezekuta “mandado de busca domiciliária e apreensăo” hosi Tribunál Distritál Dili (TDD), ho Númeru Único Crime (NUC) 133/22.PNSIK, hodi halo buska no apreensaun bá autór ne’e iha rezidénsia privadu ida iha Díli.
Durante prosesu buska ne’e, SIKN konsege halo apreensaun ba evidénsia eletrónika sira mak hanesan, telemovel, kamera CCTV, inklui evidénsia sira seluk tán. Daudaun ne’e, autór refere asegura hela iha sela PNTL, Caicoli, hodi submete bá investigasaun.
Advertisement
Suspeitu RFT nu’udár autór bá krime tráfiku umanu, ne’ebé mak bandu iha artigu 163, lei númeru 1, alínea d ho e, hosi Kódigu Prosesu Penál TL.