Hatutan.com, (22 Juñu 2022), Dili-Policia Ciêntífica de Investigação Criminal (PCIC), Kuarta (22/06/2022), halo detensaun bá timoroan na’in-tolu iha Díli tanba deskonfia envolve iha kazu krime tráfiku umanu no asosiasaun kriminoza hodi fasilita no trata dokumentu hosi juventude timoroan sira bá servisu iha estranjeiru.
PCIC halo buska no apreensaun bá timoroan balu ne’ebé deskunfia komete krime trafiku umanu no asosiasaun kriminoza. Foto/Hatutan.com
PCIC ninia ezekusaun ho baze mandadu hosi Tribunál Distritál Dili (TDD) kona-bá Buska no Detensaun bá autór sira ho Númeru Único Críme (NUC) 0248/22/PCIC.
Autór sira ne’e, PCIC detein iha fatin ne’ebé diferente iha área jurisdisaun Dili nian, maka hanesan, autór MV, iha área Benfíca, Dili, iha tuku 12:33 Otl, autór HdS detein iha área Comoro, tuku 15:02 Otl no autór ho inisiál JG, PCIC detein iha Aldeia Faulara, Suku Bebonuk, Postu Administrativu Dom Aleixo.
Durante prosesu sira ezekusaun ne’e, PCIC halo mós buska ba rezidénsia autór sira nian mak hanesan, Kampung Baru, Ai-mutin ho Faulara (Bebonuk), Dili.
Advertisement
Fatin lima ne’ebé PCIC halo buska, nu’udár mahon bá autór sira hodi hala’o atendimentu bá juventude timoroan sira ne’ebé mak hakarak rejista naran inklui submete dokumentu sira atu bá servisu iha nasaun estranjeiru.
Envolvimentu autór sira nian ba krime tráfiku umanu ho asosiasaun kriminoza ne’e, previstu iha artigu 163, númeru 1, alínea (d) ho (e), Lei Kódigu Penál Timor-Leste.
Tuir prosedimentu legál, PCIC sei halo detensaun bá autór sira ne’e iha Sela Detensaun PCIC, durante oras 72 nia laran, hafoin submete kedan ba prosesu primeiru interrogatóriu iha Tribunál Distritál Dili (TDD).