Telkomcel Komprometidu Promove Turizmu Timor-Leste

Hatutan.com, (22 Juñu 2022), Díli- Diretór Ezekutivu Telekomcel, Dedi Edward Ambarita, afirma Telkomcel iha kompromisu apoia Governu no Estadu Timor-Leste hodi promove setór turizmu no kafe Timor orijinál iha li’ur.

Lee Mós : Telkomcel Lansa Aplikasaun “My Loja”

Diretór Ezekutivu Telkomcel, Dedi Edward Ambarita entrega prenda bá PR José Ramos-Horta. Foto/Mídia GPR

Diretór Ezekutivu Telkomcel, Dedi Edward Ambarita bá jornalista sira hafoin hasoru malu ho Prezidente Repúblika (PR) iha Palásiu prezidensiál Díli, Kuarta (22/06/2022), hateten, sira-nia parte agradese Governu Timor-Leste ne’ebé fó apoiu tomak bá Telkomcel durante tinan 10 Telkomcel investe iha Timor.

Atualmente funsionáriu Telkomcel 95% mesak timoroan no hanesan Telin Grupu Telkomcel apoiu programa Governu Timor-Leste, liu-liu kona-bá turizmu tamba ida-ne’e mak Telkoncel  nia kompromisu.

Alem de promove seitor turizmu Telkomsel mos hakarak promove kafé Timor ho Telkomcel nia parseiru sira ne’ebé espalla iha nasaun hotu hodi tulun halo promosaun ba kafé Timor.

“Kona-ba promove kafé Timor, Telkomcel sei koordena ho nia ajénsia iha nasaun 10 hanesan iha Taiwan, Hongkong, Singapura, Mianmar, Amérika, Sidney-Austrália, no Dubai, ami kompromete promove kafé Timor,” Dedi Edward Ambarita hateten.

Diretur ezekutivu ne’e hatutan Telkomcel iha disponibilidade atu apoia programa Governu Timor-Leste nian, liu-liu inisiativa sira kona-bá turizmu no produtu orijinál Timor-Leste nian bá mundu.

Durante Telkomcel investe iha Timor tinan 10, la’ós fó de’it kapasitasaun bá rekursu umanus, maibé mós konstrui ona infraestrutura sira no Telkomcel kontinua halo hela servisu hodi moderniza rede internet tanba investe iha teknolojia presiza fundus ne’ebé boot no buat hotu presiza iha prosesu. Daudaun ne’e kliente ne’ebé uza servisu operadór telekomunikasaun Telkomcel nian iha Timor-Leste hamutuk 300.000-resin.

Jornalista: Vito Salvador