Violénsia Bazeia Bá Jéneru Kontra Kultura Timor-Leste

Hatutan.com, (28 Juñu 2022), Díli- Fokupers kondena aktu violénsia bazeia bá jéneru no konsidera hahalok sira-ne’e la reflete ho kultura Timor-Leste nian.

Lee Mós : SEFOPE Laiha Koñesimentu Bá Traballadora Ne’ebé “Abandona” iha Abudabi

Diretora ezekutivu Fokupers, Maria Fatima Pereira Guterres. Foto/Hatutan.com

Diretora Ezekutivu Fokupers, Maria Fátima Pereira Guterres bá Jornalista sira hafoin hasoru malu ho Prezidente Republika (PR), José Manuel Ramos-Horta iha Palásiu Prezidensiál, Tersa (28/06/2022), hateten, Fokupers durante ne’e servisu maka’as atu fó advokasia no asisténsia bá vitima sira violénsia bazeia bá jéneru hanesan kazu violénsia doméstika, insestu, violénsia sexual no kazu seluk mak kazu abandona.

Fokupers fó asisténsia bá vitima violénsia bazeia ba jéneru ne’ebé iha no  kontinua halo advokasia hodi tau atensaun bá violénsia bazeia bá jéneru hodi hametin polítika Governu ka ministériu relevante sira-nian oinsá bele reintegra vitima sira ba iha familia, sosiedade ka komunidade atu sira kontinua asesu bá edukasaun, saúde inklui mós ho asesibilidade seluk ne’ebé sidadaun sira merese atu hetan.

“Fokupers servisu hamutuk ho Ministériu Edukasaun atu oinsá reintegra hikas vitima sira bá eskola tamba kazu violénsia seksuál no mós insestu tamba too ohin loron eskola sira susar tebes atu simu hikas estudante sira ne’ebé vitima bá violénsia bazeia ba jéneru,” Maria Fatima Pereira Guterres hateten.

Hafoin rona aprezentasaun bá servisu sira ne’ebé Fokupers halo hodi tulun ka fó asisténsia bá vítima sira violénsia bazeia bá jéneru nian, Xefe Estadu José Ramos-Horta, rekomenda atu organizasaun sira ne’ebé servisu bá iha asuntu hapara violénsia bazeia bá jéneru tantu iha parte prevensaun, protesaun no asesu bá justisa nian atu nafatin kontinua sir- nia misaun no servisu hotu ho di’ak.

Prontu Fó Asisténsia Bá Traballadora iha Abudabi

Diretora ezekutivu Fokupers, Maria Fatima Pereira Guterres, afirma Fokupers prontu fó asisténsia bá traballadora na’in-hitu ne’ebé daudaun ne’e ‘abandonada’ hela iha Abudabi, Uniaun Emiradu Árabe.

 “Se karik maluk feto (Traballadora) sira presiza asisténsia bá iha uma mahon Fokupers sei nafatin kria kolaborasaun iha ne’ebá,” Maria Fatima Pereira Guterres hateten.

Lee Mós : Traballadora Na’in-hitu “Abandona” iha Abudabi

Jornalista: Vito Salvador