Karreta Estadu Ne’ebé Ekipa Konjunta Halo Apreensaun iha fim de semana, 02 Jullu 2022, iha Díli tanba funsionáriu públiku sira utiliza la tuir nesesidade. Foto/Hatutan.com
Inspetór Polísia, Domingos Sarmento Gama, nu’udár Komandante Unidade Tránzitu Díli, informa, veíkulu Estadu hamutuk 10 ne’ebé ekipa operasaun konjunta sira prende iha iha “fim de semana” ne’e, funsionáriu ka infratór sira hahú kumpre daudaun sansaun administrativa iha komandu PNTL Munisípiu Díli.
“Motorista balun hanesan ho inisiativa tuiliza veíkulu Estadu, sira mai selu daudaun ona, no iha ida-rua mak seidauk selu. Mais ha’u katak, semana ida ne’e sira sei selu hotu, tanba ne’e parte infrasaun,” Domingos Sarmento Gama, hateten bá jornalista sira iha kna’ar fatin, komandu PNTL Díli, Kinta (07/07/2022).
Advertisement
Bainhira infratór sira ne’e mak la kumpre sira nia devér, maka responsabilidade ba funsionáriu sira ne’e sei aumenta todan liután. Tanba ne’e, nia husu nafatin bá funsionáriu sira, di’ak liu, buka koopera ho autoridade sira polisiál nian, hodi kumpre sira nia devér.
“Duké la selu, para depois ita halo tiha relatóriu bá sira nia ministériu, ministériu bele loke tán mós prosesu bá sira. Ne’ebé, ha’u fiar katak, sira sei mai selu iha semana ida ne’e nia laran,” Domingos Sarmento hateten.
Iha sábadu (02/07/2022), tuku 09:00 Otl, ekipa operasaun no fiskalizasaun konjunta kompostu hosi Diresaun Jerál ba Jestaun Patrimóniu Estadu (DGGPE), Comissão da Funcão Pública (CFP), Comissão Anti Corrupção (CAC), Diresaun Nasionál bá Transporte Terrestre (DNTT) ho PNTL halo auto stop, konsege halo apreensaun bá patrimóniu estadu hamutuk 10, ne’ebé kondús hosi funsionáriu estadu sira, iha tempu “fim de semana” ho feriadu.
Patrimóniu estadu sira ne’e, kompostu hosi karreta lima, motorizada 5, iha área rotunda Kuluhun, Mandarin, ho Elemloi, Díli.
Ekipa konjunta sira nia intervensaun iha terrenu ne’e, haktuir ba rezolusaun Governu númeru 130/2021, ne’ebé ho objetivu atu mellora efisiénsia no efetividade utilizasaun bá iha despeza Estadu.