JC Alegadu Prizaun Tinan Haat Tanba Halo Violasaun Seksuál Hasoru Menoridade

Hatutan.com, (14 Jullu 2022), Díli—Tribunál Distritál Díli (TDD) liu hosi alegasaun Ministériu Públiku (MP) ne’ebé reprezenta hosi Prokuradora Benvinda de Rosário husu Tribunál atu aplika pena prizaun tinan haat ba arguidu ho inisiál JC ba krime aktu seksuál adolecente tanba halo violasaun seksuál hasoru lezada D ho idade 15.

Tribunál Distritál Díli. Foto/Hatutan.com.

Razaun MP husu pena ne’e, tanba faktus provadu bazeia ba arguidu nia deklarasaun durante julgamentu katak, arguidu pratika krime ne’e ba lezada iha Tasi-ibun maski hakarak ho hakarak, maibé arguidu rasik bosok katak nia klosan, realidade iha ona feen.

Lee Mós: Menus Rekursu Umanu ho Sala Julgamentu Difikulta Serbisu TDD

Alende ne’e, arguidu mós fó lia-fuan no jura ba lezada katak nia sei klosan, maski realidade arguidu iha ona feen, tanba ne’e lezada sofre dala-rua tanba hetan baku hosi arguidu nia feen-kaben.

Parte defeza João da Costa husu ba Tribunál atu tetu didi’ak hodi fó kastigu ne’ebé kamán ba arguidu tanba arguidu ho lezada hakarak ho hakarak no arguidu la obriga lezada.

Audiénsia julgamentu prezide hosi juiz singulár Argentino Nunes, MP reprezenta hosi Prokuradora Benvinda do Rosário no arguidu hetan asisténsia legál hosi DP João da Costa.

Jornalista: Carmelita Isaac