Internasionál
Jokowi Promete Rezolve Disputa Fronteira Naktuka ho Bijaele-Sunan
Hatutan.com, (19 Jullu 2022), Bogor—Prezidente Repúblika Indonézia, Joko Widodo promete no hakarak tebes atu nasaun rua tuur hamutuk iha tempu badak, hodi rezolve disputa fronteira rai-maran hanesan Naktuka no Bijale-sunan iha fonteira Rejiaun Administrativa Espesiál Oecusse Ambeno (RAEOA) ho Distritu Timor Tengah Utara (TTU) provínsia Nusa Tenggara Timur (NTT), atu bele dezenvolve kooperasaun iha área ekonomia ne’ebé di’ak liu.
Prezidente Joko Widodo ho Prezidente José Ramos-Horta hala’o inspesaun ba parada militár iha Palásiu Prezidensiál, Bogor, Tersa (19/07/2022). Foto/Média PR.
Jokowi hato’o promesa ne’e hafoin enkontru bilaterál ho Prezidente Repúblika Timor Leste nian, José Ramos-Horta iha Palásiu Prezidensiál Bogor, Tersa (19/07/2022).
Lee Mós: Horta ho Jokowi Kuda Ai-oan Gaharu iha Palásiu Prezidensiál Bogor
Ema númeru um iha Indonézia ne’e konsidera vizita hosi Ramos-Hora hanesan ondra boot ida ba nasaun Indonézia ne’ebé simu nakonu ho amizade hanesan maun-alin, hodi ko’alia kona-bá kooperasaun bilaterál liuliu komitmentu ba kooperasaun ekonomia sai foku prinsipál.
Alende ko’alia kona-bá kooperasaun iha área ekonomia, parte rua mós ko’alia kona-bá issue negosiasaun ba fronteira no importánsia nasaun rua atu rezolve segmentu rua iha fronteira terrestre mak hanesan Citrana no bijaele-sunan.
“Importante ba Timor Leste ho Indonézia atu rezolve disputa fronteira terrestre iha Citrana ho Bijaele-Sunan,” Jokowi hateten.
Nia mós enkoraza atu nasaun rua bele rezolve invesment agrement tanba investimentu Indonézia nian oras ne’e daudaun iha Timor Leste atinje ona $818.000.000, iha área bankária.
Jornalista: Vito Salvadór