Ramos-Horta Agradese ba Indonézia Ne’ebé Apoia Dezenvolvimentu TL

Hatutan.com, (19 Jullu 2022), Bogor—Prezidente Repúblika (PR), José Ramos-Horta, agradese ba nasaun Indonézia liu hosi Prezidente Repúblika Joko Widodo, ne’ebé apoia ona dezenvolvimentu Timor Leste nian liu hosi kooperasaun oi-oin durante tinan rua nulu.

Prezidente Joko Widodo ho Prezidente José Ramos-Horta iha Palásiu Prezidensiál, Bogor, Tersa (19/07/2022). Foto/Média PR.

Agradesimentu ne’e Ramos-Horta hato’o hafoin enkontru bilaterál ho Prezidente Repúblika Indonézia nian Joko Widodo iha Palásiu Prezidensiál Bogor, Tersa (19/07/2022).

Lee Mós: TL-RI Estabelese Kooperasaun iha Setór Haat

“Ha’u fó obrigadu ba kooperasaun ne’ebé di’ak tebes entre nasaun rua nian durante tinan 20 . Timor Leste fó obrigadu barak ba apoiu hosi Indonézia iha prosesu dezenvolvimentu no mós apoiu iha área oioin  liuliu iha área edukasaun, ne’ebé apoia Timor Leste ba kapasitasaun rekursu umanu,” Ramos-Horta agradese.

Indonézia ho Timor Leste bele haree doook liu tán ba oin kona-ba relasaun iha área ekonomia atu bele hametin liu tán relasaun entre nasaun rua nian.

“Ami espera katak, Indonézia bele apoia Timor Leste atu bele hola parte iha ASEAN bainhira Indonézia lidera organizasaun Sudeste Aziaátiku ne’e,” Ramos-Horta subliña.

Iha enkontru bilaterál ne’e, nasaun rua asina akordu (MoU) iha área agrikultura, transporte terrestre, Padronizasaun no Meteorolojia no ikus liu maka kooperasaun tékniku iha área komérsiu nian.

Kona-bá ne’e, Jokowi enkoraza atu nasaun rua rezolve lalais invesment agrement tanba investimentu Indonézia oras ne’e daudaun iha Timor Leste atinje ona $818.000.000 liuliu iha área bankária.

Jornalista: Vito Salvadór