OJETIL Sei Halibur Hikas Membru Sira Liuhosi Konferénsia Da-toluk

Hatutan.com, (25 Jullu 2022), Díli—Organização de Jovens e Estudantes de Timor Leste (OJETIL) sei halibur hikas membru sira liu hosi konferénsia nasionál da-toluk ne’ebé tuir planu sei realiza iha fulan Novembru 2022.

Prezidente Konsultivu ba terseira konferénsia OJETIL, Tomé Xavier Jerónimo hamutuk ho estrutura hasoru-malu ho Primeiru Ministru (PM) Taur Matan Ruak iha Rezidénsia Ofisíal Faról, Díli, Segunda (25/07/2022). Foto/Média PM.

Prezidente Konsultivu OJETIL, Tomé Xavier Jerónimo hamutuk ho estrutura atualiza ona asuntu ne’e ba Primeiru Ministru (PM) Taur Matan Ruak iha Rezidénsia Ofisíal Faról, Díli, Segunda (25/07/2022).

“Ami mai ko’alia ho Primeiru-Ministru kona-bá Konferênsia OJETIL ne’ebé sei hala’o ba dala tolu nian iha Novembru,” Tomé Xavier Jerónimo hateten.

Objetivu hosi Konferênsia datoluk ne’e  atu halibur fila-fali membru sira, tanba liu tiha ona tinan hira la realiza konferênsia no atu halo konferênsia hodi bolu fali membru sira atu haree hikas programa saída mak atu adapta oinsá responde ba nesesidade membru sira nian liuliu organizasaun nian, liga mós ho Sede ne’ebé iha tiha ona.

Konferênsia ne’e tenke halo, tanba depois de inaugura tiha sede ne’e tenke la’o ba oin, konferênsia ne’e entre Novembru nia laran relasiona ho loron 12 Novembru nian.

Mensajen ne’ebé ekipa ne’e simu hosi Primeiru-Ministru, lori ekipa ne’e atu hanoin fila-fali rezisténsia uluk ne’ebé halo ho kosar been sem apoiu.

Agora OJETIL ba oin ne’e oinsá forma karákter bem, oinsá atu konstrui karákter joven ida ba oin, hanesan papél boot OJETIL nian.

“Ami sente todan mais ho konversa ida hanesan maun ba alin, ita sente hanesan furak, fó apoiu mai ami atu halo buat di’ak ba OJETIL,” nia hateten.

Jornalista: Rogério Pereira Cárceres