TDD Aplika Proibisaun Auzénsia Bá Arguidu Lori Osan Falsu

Hatutan.com, (27 Jullu 2022), Díli—Tribunál Distritál Díli (TDD) liu hosi primeiru interrogatóriu ne’ebé prezide hosi juiza singulár Ana Paula Fonseca, deside aplika medida koasaun proibisaun auzénsia ba arguidu SDCF ba krime pasajen moeda, tanba deskonfia lori osan falsu hosi Inglaterra mai Timor Leste (TL).

Osan Falsu ne’ebé Ema Lori Hosi Inglaterra. Foto/Hatutan.com.

Juiza Ana Paula Fonseca esplika, medida koasaun proibisaun auzénsia signifika arguidu labele sai hosi TL hodi asegura arguidu nia prezensa durante prosesu investigasaun.

Lee Mós: PCIC Detein MG Lori Osan Falsu Hosi Inglaterra

Razaun Tribunál aplika medida koasaun ne’e, tanba iha indisius forte katak, arguidu lori duni osan falsu mai hosi Inglatera bazeia ba konviksaun arguidu nian katak osan hirak ne’e nia lori duni hosi Inglatera.

Iha Primeiru Interrogatóriu ne’e Ministériu Públiku (MP) ne’ebé reprezenta hosi Prokuradór Ricardo Goveia Leite promove arguidu ba prátika krime pasajen moeda ne’ebé previstu iha artigu 308 hosi kódigu penál TL.

Antes ne’e, iha loron 25 Jullu, Ministériu Justisa (MJ), liuhosi Policia Ciêntífica e de Investigasaun Criminal (PCIC) halo detensaun ba arguidu durante horas 72 hafoin halo detensaun em flagrante delito iha tuku 09 liu iha área Banku Sentrál Timor-Leste (BCTL-Sigla Português), tanba lori osan falsu hosi nasaun Inglaterra mai TL.

Audiénsia julgamentu prezide hosi Juiza  singulár, Ana Paula Fonseca, MP reprezenta hosi Prokuradór Ricardo Goveia Leite no Arguidu hetan asisténsia legál hosi Advigadu Privadu Sérgio Gama Lobo da Silva Junior. 

Jornalista: Carmelita Isaac