ANPM Dezmente “Boatu” Kombustivel Menus iha Timor-Leste

Hatutan.com, (28 Jullu 2022),  Díli-Autoridade Nacional do Petróleu no Minerál (ANPM), desmente “boatu” ne’ebé sirkula iha públiku katak kuantidade kombustivel menus iha Timor-Leste.

Lee Mós : Breaking News: ETO Husu Povu Labele Pániku Tanba Sei La Akontese Krize Kombustivel

Motorista sira paniku ho boatu kombustivel menus iha Timor-Leste hod i bá hobur enxe mina iha Sentru Estasionamentu KOmbustivel ETO iha Bebora, Díli, KInta (28/07/2022). Foto/Hatutan.com

Liuhusi komunikadu imprensa ne’ebé Hatutan.com asesu husi ANPM, Kinta (28/07/2022), ANPM informa bá públiku katak fornesimentu (Stock) kombustivel (Gazolina no Gazóleu) iha armazén boot rua, hanesan Pertamina International Timor (PITSA) iha Praia dos Coqueiros no Esperansa Timor Oan (ETO) iha Hera, sufisiente hela hodi bele atende nesesidade konsumidór iha Timor laran tomak.

 ANPM mós hakarak informa katak oras ne’e daudaun Ró tula kombustivel atraka ona iha Ponte Kais Armazén Kompañia PITSA nian no sei halo deskarregamentu ohin loron kuantidade Gazolina hamutuk litru tokon 2 resin (2.494.372 litru) no Gazóleu tokon 1 resin (1.632.203 litru). Enkuantu ANPM sei konfirma kuantidade kombustivel iha Armazén Kompañia ETO nian, maske nune’e, kompañia ETO fó sai ona iha sira-nia pájina media sosiál katak sira iha rezerva kuantidade ne’ebé sufisiente.

 Kompañia PITSA no ETO hanesan distributor boot rua iha Timor-Leste sempre importa kombustivel tuir kalendáriu importasaun no mós depende bá nesesidade iha rai laran. To’o agora laiha interrupsaun bá kalendáriu importasaun kombustivel.

ANPM apela bá públiku katak atu la presiza pániku ho r boatu kona-bá kombustivel menus iha armazén ho retallu sira. Ho kolaborasaun di’ak tomak hamutuk ho importadór ho postu abastesimentu kombustivel sira hotu ANPM sei garantia distribuisaun kombustivel iha merkadu ho efetivu no efikás.

 Jornalista : Vito Salvador