MDF Sei Haklaken Turizmu TL Iha Austrália Durante Tinan Tolu

Hatutan.com, (29 Jullu 2022), Díli—Governu liu hosi Ministériu Turizmu Komérsiu Indústria (MTKI) asina akordu ho Ajénsia Market Development Facility (MDF) hosi Austrália ho durasaun tinan tolu, hodi halo kampaña kona-bá Turizmu Timor Leste (TL) iha Austrália hodi dada turista sira mai vizita fatin turizmu sira iha TL.

MTKI asina akordu ho Market Development Facility (MDF) hosi Austrália atu halo kampaña lori turista hosi Austrália mai TL. Gabinete MTKI, Díli, Sesta (29/07/2022). Foto/Hatutan.com.

MTKI deside asina akordu ho ajénsia ida-ne’e, tanba iha esperiénsia halo kampaña lori turista hosi Austrália mai TL.

“Akordu ida-ne’e atu haree estratejia Governu TL hamutuk ho MDF hodi halo kampaña kona-bá Turizmu Timor nian iha Austrália hodi enkoraza no atrai turista sira mai fali Timor, depois de ultrapasa situasaun Covid-19 ho nune’e estratejia ne’ebé iha sei deskuti detallu atu sai pakote ida de’it hodi halo promosaun iha Austrália,” Ministru MTKI, José Lucas do Carmo da Silva hateten iha Gabinete MTKI, Díli, Sesta (29/07/2022).

Mekanizmu kampaña ne’ebé MDF utiliza liu hosi média sosiál, filmajen, brosura no seluk-seluktan hodi transmite ba turista sira.

Iha promosaun ne’e, TL sei lori turizmu beleza, tasi, paisazen foho, fatin istóriku no turizmu reliziozu, tanba tuir survei MDF katak, maioria turista sira interese liu mak turizmu tasi TL ne’ebé moos.

Hosi parte MDF promete sei tulun TL liu hosi kampaña refere, nune’e bele lori hikas turista Austrália mai TL, tanba durante Covid-19 númeru turista vizita TL tun.

“MDF sei foka ba turizmu área tolu mak hanesan dive tourist, cruz tourist no destination marketing hodi haburas no diversifika fali ekonomia ne’ebé dook hosi fundu petroliferu, tanba Austrália hanesan nasaun ne’ebé merkadu besik ho TL. Tanba ne’e, importante tebes hodi fó tarjetu ba Austrália hodi dada fali Turista sira mai TL liu hosi kampaña,” Country Director MDF, Drew Johnson hateten.

Tuir dadus MDF hatudu katak, antes Covid-19 turista ne’ebé vizita TL hamutuk 70.000 no konsidera seidauk másimu tasnba ne’e MDF sei halo esforsu nune’e depois de implementa akordu ne’e númeru refere bele aumenta.

Jornalista: Carmelita Isaac