PM Taur Sei Koordena Lori Fila Estudante 126 Kontinua Estudu iha Xina

Hatutan.com, (02 Agostu 2022), Díli—Primeiru Ministru (PM), Taur Matan Ruak sei koordena ho Ministériu relevante sira atu buka solusaun hodi lori fila estudante Timoroan na’in 126 ba kontinua sira nia estudu iha Xina.

Primeiru Ministru Taur Matan Ruak. Foto/Média GPM.

Reprezentante hosi Asosiasaun Estudantes Timoroan iha Xina, Esmeraldito Ferreira, hato’o ona situasaun kona-bá kestaun estudante na’in 126 ne’ebé hetan difikuldades atu fila fali ba Xina hodi  kontinua estudu tanba iha problema ho voo koneksaun  hosi Timor-Leste ba Xina.

Lee Mós: Ramos-Horta Sei Komunika Atu Lori Hikas Bolseiru Timoroan Sira Kontinua Estudu iha Xina

Tanba ne’e enkontru ne’ebé hala’o iha rezidénsia ofisiál PM Faról, Tersa (02/08/2022) reprezentante Estudante ne’e, husu Xefe Governu nia apoiu oinsá bele buka solusaun atu sira bele fila-fali ba Xina hodi kontinua sira-nia estudu, tanba balun teoria hotu ona no hein de’it ba peskiza.

“Hatán ba preokupasaun ne’e, Xefe Governu kompromete sei ko’alia ho Ministériu Ensinu Superiór Siénsia no Kultura, Ministériu  Finansas, Ministériu Negósius Estranjeirus no Kooperasaun no Embaixada Timor-Leste iha Pekim hodi bele hetan solusaun ba kestaun ne’e,” Hatutan.com sita komunikadu.

Estudantes bolseiru ba Xina na’in 126 daudaun ne’e seidauk bele fila ba Xina atu kontinua sira-nia estudu, tanba problema ho voo koneksaun Dili ba Xina.

Problema ida seluk ne’ebé estudante sira ne’e hasoru maka autorizasaun hosi Governu Xina atu fila-fali ba Xina, maibé hetan ona autorizasaun hosi Governu Xina, agora problema mak voo.

Estudante sira ne’e fila mai Timor-Leste tanba balun pasaporte inválidu, balun mai férias no balun fila tanba situasaun Pandemia Covid-19.

Antes ne’e, reprezentante estudante hirak ne’e hato’o ona preokupasaun ne’e ba Xefe Estadu José Ramos-Horta iha Palásiu Prezidensiál Bairru-Pité, Díli.

Jornalista: Rogério Pereira Cárceres