Jornalista: Felix Fernandes 

Hatutan.com, (09 Outubru 2026) Díli- Tribunál Judisiál Primeira Instánsia Díli  (TJPID) liu husi Juiz singular Argertinho Nunes, fó dame ba membru FALINTIL-Forsa Defeza Timor-Leste (F-FDTL) ida  ho ofendidu na’in-rua ba kazu krime intergridade fizíka simpes. 

Ofendidu na’in-rua perdua membru F-FDTL ne’ebé baku sira na’in-rua hanesan ema maksalak iha área Suku Kuluhun,  iha loron 01 fulan-Janeiru 2025.

Tribunál Judisiál Primeira Instánsia Díli.

Kronolojia ne’ebé aprezenta husi Prokuradór Nelson Magno reprezenta Ministériu Públiku  iha audénsia julgamentu, Sesta (9/10/2026), katak iha  loron 01 Janeiru  2025, hale’u tuku 16:00 Otl,  iha Taibessi, Suku Kuluhun, ofendidu hetan  agresaun fizíku husi arguidu membru F-FDTL ne’e.

Ofendidu ne’e,   konfesa tribunál katak,   arguidu  tuku  nia dala tolu no kontinua  tuku-tebe iha parte karuk, no  tebe tan ofendidu iha nia kabun dala haat.

Arguidu kontinua nia hahalok agresaun ida ne’e bá fali iha ofendidu seluk   hodi tuku dala-tolu iha oin.

Arguidu halo nia hahalok ida ne’e tanba de’it haree hetan ofendidu sira hamrik iha sira nia uma oin bainhira arguidu sira halo atuasaun ba grupu sira ne’ebé maka tuda malu iha fatin refere.

Konsekuensia direta husi arguidu nia hahalok ida ne’e halo ofendidu  ida hetan moras iha parte atinjidu no arguidu nia hahalok ida ne’e ho forma livre, deliberada ho intensaun  maske hatene momoos katak tuku no tebe ema seluk nia isin hodi kauza kanek, moras no bubu, maibé arguidu hakarak halo nafatin tuir saida maka arguidu hakarak no arguidu mós hatene hela katak ida ne’e lei bandu no sei hetan kastigu tuir lei.

Ho hahalok sira ne’e hotu  Ministériu Públiku konsidera, arguidu hanesan autor material ho forma konsumadu ba pratika krime  rua iha konkursu, Ofensa ba integridade fizika simples ne’ebé previstu no punidu tuir artigu  145   konjuga ho artigu  35 númeiru-1  husi kondigu Penál Timor-Leste.

Juíz singular Argertinho Nunes,  husu ofendidu na’in-rua hakarak,  rezolve liu meiu dame malu iha   Tribunál  nia oin.

Ofendidu na’in rua  mós aseita atu rezolve famlia, maibé arguidu tenke selu indemnizasaun sivíl US$400.00  tanba hetan agresaun fizíku todan, no  ofendidu seluk arguidu tenke selu indemnizasaun sivíl US$40.00.

Ofendidu mós konkorda, ho indemnizasaun ne’e, maibé husu tribnál atu selu dala rua,  tanba dadaun ne’e arguidu halo hela kéditu iha banku.

Prokuradór Nelson Mangno omologa bá tribunál hodi absolve arguidu  membru F-FDTL husi krime konkursu no krime ofensa ba integridade fizika simples.

Parte defeza liu-husi  Defensór Públiku konkora ho alegasaun, tanba ofendidu  na’in-rua fó perdaun bá malu iha Tribunál, maibé la bele kontinua akontese tan iha future.

 Rona tiha alegasaun husi parte sira, Tribunál deside  absolve arguidu husi sirkunstansia kriminál nian hanesan konkursu, ofensa ba integridade fizika simples.

Tribunál mós halo válida  preazu indemnizasaun sivíl, arguidu selu bá  ofendidu US$400.00, no ofendidu ida seluk US$40.00  ho prazu  indemnizasuan dahuluk iha fulan ne’e hahú iha loron 21 to’o loron 28 Outubru 2026.

Indemnizasaun segundu iha loron 23  to’o loron 25 Novembru, selu iha tribunál total orsamentu  títulu indemnizasaun US$450.00. (*)