Jornalista: Maria Angeliga Sandi Belo

Hatutan.com (9 Outubru 2026), Díli– Institutu Nasionál Kombate HIV-SIDA (INCSIDA), Sesta (9/10/2026), hala’o sensibilizasaun ba estudante sira husi Centro Formasaun Tane Futuru (CFTF) hamutuk na’in-300 atu hasa’e koñesimentu kona-bá prevensaun no risku transmisaun HIV-SIDA, liu-liu entre joven sira.

INCSIDA hala’o sensibilizasaun kona-ba prevensaun HIV-SIDA ba estudante sira husi Centro Formasaun Tane Futuru (CFTF), Sesta (9/10/2026). Foto/Maria Angeliga Sandi Belo

Prezidente INCSIDA, Daniel Marçal, hatete sensibilizasaun ne’e importante atu hametin koñesimentu komunidade nian kona-bá HIV no promove kolaborasaun entre ema hotu atu prevene transmisaun vírus ne’e.

“Ita hotu tenke hamutuk atu prevene transmisaun HIV liu husi ko’alia ba malu, fahe informasaun no fó hanoin ba malu, ida ne’e mak ita hotu nia objetivu,” Daniel Marçal hateten.

Daniel Marçal esplika katak falta koñesimentu kona-bá HIV no prevensaun bele aumenta risku ba joven sira, tanba ne’e, nia husu joven sira atu komprende didi’ak dalan transmisaun HIV, halo teste HIV no buka tratamentu sedu bainhira presiza.

“Joven sira mak futuru nasaun nian, se joven sira laiha koñesimentu kona-bá transmisaun no prevensaun HIV-SIDA, ida ne’e bele aumenta risku ba sira-nia saúde no futuru, inan-aman sira esforsu maka’ás atu kria futuru ne’ebé di’ak ba sira-nia oan, tanba ne’e, importante tebes atu joven sira iha koñesimentu no halo prevensaun,” nia hatete.

Nia mós enfatiza katak teste no tratamentu sedu bele ajuda ema ne’ebé moris ho HIV atu hetan kuidadu saúde ne’ebé apropriadu.

INCSIDA kontinua hala’o atividade sensibilizasaun ba komunidade iha Timor-Leste, liu-liu ba joven sira, atu hasa’e koñesimentu kona-bá HIV, promove prevensaun, no enkoraja ema atu halo teste no hetan tratamentu iha fasilidade saúde ne’ebé besik.

Iha fatin hanesan, Diretór Ezekutivu Sentru Formasaun Tane Futuru, Mauricio Guterres, hatete, CFTF halibur estudante feto no mane na’in 300, nune’e atividade sensibilizasaun ne’e sai oportunidade importante atu sira komprende risku transmisaun HIV no dalan atu prevene.

Prevensaun tenke sai prioridade liuhusi edukasaun no konsiénsia, atu joven sira bele proteje an no halo desizaun ne’ebé di’ak ba sira-nia saúde.

“Importante atu ita fó koñesimentu ba joven sira kona-ba oinsá atu prevene transmisaun HIV. Ita tenke fó atensaun ba risku sira no promove prevensaun sedu, duke hein to’o moras sai grave,” dehan Mauricio Guterres. (*)