Defeza & Seguransa
SIP Kaptura Joven Ida Na’ok Ekipamentu Informátika iha Manleuana
Hatutan.com, (02 Agostu 2022), Díli—Polísia Nasionál Timor-Leste (PNTL), liuhosi Servisu Informasaun Polísia (SIP) Nasionál, kaptura joven mane ida ho naran inisiál EPS tinan 23 hosi Laclubar Munisípiu Manatuto, hela iha Aldeia 01 Suku Caicoli, Postu-Administrativu Vera-Cruz, Munisípiu Díli, ne’ebé envolve krime jerál ba kazu na’ok ekipamentu informátika iha Área Manleuana.
PNTL liuhosi Servisu Informasaun Polísia, Nasionál kaptura joven mane ida ho naran inisiál EPS tinan 23, hela iha aldeia 01 Suku Caicoli, Postu-Administrativu Vera-Cruz, ne’ebé envolve krime jerál ba kazu na’ok ekipamentu informátika iha Área Manleuana. Foto/PNTL.
Hafoin simu informasaun, Xefe Servisu Informasaun Polísia, orienta kedan nia membru sira halo vizilánsia durante oras 24 nia laran buka informasaun no konsege kaptura EPS iha nia uma iha Caicoli no rekolla mós evidénsia labtop rua ho marka Asus ne’ebé mak nia fa’an ona ba ema estranjeiru ida hosi Indonézia.
Lee Mós:SIP Kaptura Suspeitu Na’in-tolu Hadau Telemóvel iha Comoro
“Tuir deklarasaun hosi suspeitu, iha loron Domingu 31 jullu 2022, tuku 13:00 otl, nia ho motór marka Revo Fit, kór azul xapa matríkula M.4222 TLS, ba iha área Aldeia Baia Leste, Suku Manleuana suspeitu haree uma kor mutin portaun loke hela nia tama ba vítima nia uma laran hodi na’ok labtop ho marka ASUS hamutuk 2 no lori kedan sasán na’ok ne’e ba fa’an ho presu $300 ba sidadaun Indonézia ida ho naran Edi Sulikin, iha área Audian fatin hadi’a telefone iha loja Sahabat nia sorin,” Hatutan.com sita komunikadu.
Ekipa servisu mós halo kontaktu kedan ba vítima ho naran Kapila Prasanna no Steve Fernandes, ne’ebé antes ne’e hatama ona keixa hodi mai haree nia labtop, infelizmente tanba labtop apaga hotu dadus no halo ona instalasaun foun, nune’e vítima nain-rua lamenta no husu atu sidadaun Indonézia ne’e responsabiliza nia aktu ne’ebé kontribui ba krime refere.
Vítima na’in-rua ne’e mós hato’o agradesementu wa’in ba SIP-PNTL nia profisinalizmu, tanba halo servisu extraordinária iha loron ida de’it buka hetan suspeitu hamutuk kedan ho sira-nia labtop ne’ebé lakon no nia husu atu prosesa sidadaun Indonézia ne’e tuir Lei.
Hafoin halo identifikasaun, Xefe Ekipa SIP nasionál entrega diretamente suspeitu EPS hamutuk ho evidénsia labtop rua no motór ida, ba Servisu Investigasaun Kriminál Eskuadra Dom Aleixo Comoro, hodi halo prosesu investigasaun no detein durante oras 72, tuir lei ne’ebé iha, antes submete ba Tribunál hodi tuir porsesu julgamentu.
Antes ne’e, suspeitu EPS mós komete kazu na’ok osan ne’ebé mak rejista ona iha Polísia Nasionál Timor Leste (PNTL).
Jornalista: Rogério Pereira Cárceres