Governu Tau $200,000 Prepara Kondisaun iha Semitériu Públiku Metinaro

Hatutan.com, (03 Agostu 2022), Díli- Ministru Administrasaun Estatál (MAE), Miguel Pereira de Carvalho, informa Governu hahú halo konstrusaun inísiu ho vedasaun (aterra rai) iha semitériu foun Metinaro ho orsamentu $200,000, atu nune’e, bainhira semitériu Becusse nakonu iha tempu besik hahú hakoi mate iha semitériu foun Metinaro.

Lee Mós: Semitériu Públiku Foun Iha Metinaro Ektares 35

Autoridade Miunisípiu Díli lansa ona semitériu públiku foun ho nia medida ekteres 35 iha Suku Wenunuk, Postu Administrativu Metinaro, Tersa (14/06/2022). Foto/AMD.

Ministru Miguel Pereira de Carvalho, Kuarta (03/08/2022), iha Palásiu Governu haktuir ba jornalista sira katak MAE servisu hamutuk ho Institutu Jestaun Ekipamentu (IGE, sigla portugés)  hahú aterra fatin balun iha semitériu  Metinaro, atu nune’e, bele hakoi mate iha fatin refere.

Konstrusaun dahuluk ne’ebé Governu hahú halo iha fatin refere mak konstrusaun bá Kapeliña ida no hahú hadi’a dalan no aterra rai sira ne’ebé nesesita atu fasilita atividade funerál.

Governu iha hanoin atu halo preparativus sira ho kondisaun mínimu ne’ebé iha hodi asegura bainhira rate Becusse nakonu bele ona iha kondisaun atu haloot mate isin iha rate foun Metinaro.

Governu iha ona regra no padraun  kona-bá iijiene no orden públiku ne’ebé hateten uainhira ema mate so bele hakoi de’it iha semitériu públiku no bandu komunidade sira hakoi mate iha uma ninin.

Governu mos husu atu família sira labele iha desizaun mesak hodi kria semitériu família ne’ebé lori destruisaun bá orden públiku no fó imajen negativu bá sosiedade tamba la tuir ona regra orden públiku ne’ebé iha.

Semitériu públiku Metinaro ho luan rai hamutuk 15 hektare no ida ne’e sei utiliza bá tempu naruk no sai hanesan ulitmu semitériu públiku Munisípiu Díli nian.

Jornalista: Vito Salvadór