PNTL Kaptura Autór Asalta Restaurante Ida iha Akadiru-hun

Hatutan.com, (03 Agostu 2022), Díli-Polisia Nasionál Timor-Leste (PNTL) Eskuadra Na’in-Feto, Díli, hamutuk ho Forsa Rezerva sira,  Kuarta rai-nakaras (03/08/2022),  kaptura autór na’in-rua ho inisiál AMS no JM iha área kapitál Dili nian, tanba asalta restaurante Bakso Pelakor iha Suku Bidau-Akadiru-hun, Postu Administrativu Nain-Feto, Munisípiu Díli.

Lee Mós : SIP Kaptura Joven Ida Na’ok Ekipamentu Informátika iha Manleuana

Komandante Operasaun Munisípiu Díli, Inspetór Polisia, Delfin da Silva. Foto/Media PNTL

Komandante Operasaun Munisípiu Díli, Inspetór Xefe Polísia, Delfin da Silva, haktuir kronolojia katak, iha Tersa kalan (02/08/2022), hale’u  tuku 21:42 Otl, vítima Francisco de Deus (19), servisu hela iha Loja 24 oras besik eskola Katólika São Paulo nia oin.

Derrepente de’it mosu suspeitu na’in-rua ho kondisaun lanu, tama  iha restaurante nia laran, hodi hosu bá vítima, atu haruka telefone bá nia kolega sira ida seluk, Paizinho atu tuku malu ho suspeitu AMS ho JM.

Ho emosaun, suspeitu sira mós foti hudi sasuit  ida ne’ebé tau hela iha meza nia leten tuda bá vítima iha parte kotuk hodi tolok mós vítima. Maibé, suspeitu sira la konsege halo agresaun fízika hasoru vítima  no suspeitu sira deside hasees aan hosi fatin insidente.

“Relasiona ho kazu ida ne’ebé mak akontese iha área Akadiru-hun, horikalan, ita-nia patrulla hosi Na’in-Feto, nune’e mós hosi ami nia forsa rezerva, atende ona, entrega ona bá iha Eskuadra Na’in-Feto hodi submete bá iha prosesu identifikasaun,” Komandante Operasaun Munisípiu Díli, Inspetór Xefe Polísia, Delfin da Silva, informa bá jornalista sira iha kna’ar fatin Komandu PNTL Díli, Kuarta (03/08/2022).

Oras ne’e, PNTL Eskuadra Na’in-Feto, halo hela prosesu identifikasaun bá suspeitu sira hodi buka hatene motive no kauza sira hosi kazu ne’e. Maibé, aktu hirak ne’ebé suspeitu sira komete ne’e, Komandu PNTL sei la tolera, no sei submete ninia prosesu bá Ministériu Públiku ka Prokuradoria Jerál Repúblika, hodi hakotu iha Tribunál Distritál (TDD).

“Suspeitu sira agora daudauk iha hela eskuadra Na’in-Feto hodi halo identifikasaun durante  oras 12. Bainhira identifika ona, aprezenta bá iha ministériu públiku, kuandu iha indikasaun krime ruma, kontinuasaun detein,”  Komandante Delfin da Silva, hateten.

Jornalista: Rogério Pereira Cárceres