JSMP Apresia Desizaun TDD bá Kazu VD Hodi Fó Alimentasaun bá Oan

Hatutan.com, (08 Agostu 2022), Díli-Programa Monitorizasaun Sistema Judisiál (JSMP, sigla Ingles) apresia ho desizaun Tribunal Distritál Díli (TDD) liu husi juis Alvaro M. Freitas bá kazu Ofensa Integridade Fízika Simples ho natureza Violénsia Doméstika (VD), tanba alende kondena arguidu ARG bá krime refere, maibe ho kondisaun ida katak arguidu tenke kumpre nia responsabilidade ka devér hodi sustenta oan liu husi fó alimentasaun ba oan kada fulan.

Diretora JSMP, Ana Paula Marcal. Foto/Espesiál

Tribunál kondena de’it aktu arguidu nian ho razaun katak devér arguidu nian bá oan, tama iha kategoria kazu sivíl ne’ebé presiza iha keixa foun ne’ebé presiza tempu naruk hodi atribui responsabilidade bá arguidu.

“JSMP apresia ás tebes ho desizaun ne’e, tanba pela primeira vés tribunál hatún desizaun bá arguidu ho devér atu arguidu tenke fó alimentasaun bá nia oan kada fulan, mezmu la indika kuantia/kada fulan hira mak arguidu tenke fó bá nia oan sira maibé desizaun ne’e hatudu ona katak labarik sira nia interese (nesesidade) urjente no la presiza tenke hein bá prosesu sivíl ne’ebé dalaruma presiza tempu kleur atu atribui responsabilidade ba arguidu hodi fó alimentu bá oan sira,” Diretora Ezekutiva JSMP Ana Paula Marçal liu husi komunikadu ne’ebé Hatutan.com asesu.

JSMP konsidera desizaun ne’e nu’udar desizaun únika no bele sai hanesan referénsia ba tribunál seluk atu aplika iha futuru ba kazu ho natureza no kondisaun hanesan, tanba iha kazu lubuk ida ne’ebé JSMP atende, menór sira barak maka hetan difikuldade atu hetan alimentu husi aman ka inan tanba de’it laiha sertidaun RDTL no atu trata sertidaun ne’e mós presiza han tempu kleur, tanba ne’e ho desizaun ba kazu ne’e, JSMP konsidera apropriadu no bele rezolve kestaun krime no sivíl dala ida de’it.

Iha kazu ne’e, rasik Tribunál kondena arguidu ho pena prizaun fulan-ualu no suspende tinan-rua bá krime ofensa integridade fízika simples ho forma VD, maibé Tribunál esplika bá arguidu katak nia la presiza bá komarka maibé ho kondisaun ida katak arguidu iha devér kada fulan tenke fó alimentasaun bá nia oan na’in-rua, no durante períodu tinan-rua arguidu labele komete kualkér aktu krime.

Tuir artigu 69 nú.2(a) husi kódigu Penál Timor Leste kona-bá prizaun nia suspensaun ho devér prevee ona katak bele sai hanesan kondisaun bá suspensaun ho devér atu repara ka fó garantia atu repara prejuizu ne’ebé krime hamosu, iha prazu determinadu, maibé iha kazu konkretu ne’e JSMP konsidera separasaun entre arguidu ho lezada tanba krime ne’e rezulta prejuizu direita ba sira nia oan ne’ebé tenke hetan alimentu no kuidadu husi inan-aman liu-liu arguidu.

Iha artigu 104 Kódigu Penal Timor Leste  kona-ba responsabilidade sivíl tanba krime mós, prevee katak ofisiozamente tenke apura no fiksa indenizasaun tanba perda no danu ne’ebé mai husi krime, maibé iha esperiénsia balun ne’ebé JSMP nota katak mezmu kazu alimentasaun bá menór ne’e kazu urjente tuir lei sivíl, maibé iha prátika kazu sira ne’e dala ruma han tempu kleur tanba menór sira tenke iha dokumentu sertidaun RDTL ne’ebé legalizadu.

Jornalista : Carmelita Isaac