CA-FDCH Aprova OJE 2023-Livru 6 Ho Montante Millaun $17-resin

Hatutan.com, (10 Agostu 2022), Díli— Liu husi enkontru Konsellu Administrasaun Fundu Dezenvolvimentu do Capital Humanu (CA-FDCH) ba dala 22 no ba dala tolu iha mandatu VIII Governu Konstitusionál nian, deside halo aprovasaun ba tetu Orsamentu Jerál Estadu (OJE) 2023 no livru 6 FDCH ho montante millaun $17.7 tuir pakote fiscal ne’ebé atribui hosi Ministériu Finansas (MF) hodi finansia programa FDCH iha tinan 2022.

Enkontru Konsellu Administrasaun Fundu Dezenvolvimentu do Capital Humanu (CA-FDCH) ba dala 22 no ba dala tolu iha mandatu VIII Governu Konstitusionál nian. Foto/FDCH.

Aprovasaun refere, hafoin rona aprezentasaun husi Diretór Ezekutivu FDCH Cristovão dos Reis kona-bá taxa ezekusaun Orsamentu Jerál Estadu (OJE) 2022-Livru -6 hahú hosi Janeiru-Jullu tuir programa kada instituisaun Governu no Estadu ne’ebé akredita ba FDCH no aprezenta mós ba CA-FDCH tetu orsamentu FDCH 2023.

Lee Mós: FDCH Gasta Ona Millaun $300 ba Bolseiru Timor-oan

“Hosi enkontru refere, ekipa mós halo aprovasaun ba atualizasaun tabela orsamentu kona-bá pedidu apoiu individuiais ba estudante universitáriu sira iha rai-laran no rai-li’ur, valór bolseiru sira iha Portugál inklui aprovasaun dokumentu Estudu no Avaliasaun ba rezultadu programa FDCH durante períodu 2015-2020 ne’ebé FDCH realiza ho kooperasaun Instituto Nacional Ciência e Tecnologia (INCT),” Diretór Ezekutivu FDCH Cristovão dos Reis hateten liu hosi komunikadu ne’ebé Hatutan.com sita, Kuarta (10/08/2022).

Aleinde ne’e, halo mós aprovasaun no apresiasaun ba ezekusaun programa CA-FDCH inklui kanselamentu bolsa estudu ba Benefisiariu sira hahú husi periodu 2011- 2021.

Enkontru ne’e, prezide hosi Ministru Ensinu Superiór, Siénsia no Kultura (MESCC) ne’ebé nu’udár Prezidente CA-FDCH, Longuinhos dos Santos no marka mós prezensa hosi membru permanente CA-FDCH hanesan, Ministru Petróleu no Minerais (MPM), Víctor da Conceição Soares, no Sekretáriu Estadu Formasaun Profisionál no Empregu (SEFOPE) Alarico de Rosário.

Jornalista: Carmelita Isaac