Taur Fó Orden Kansela Rekrutamentu Membru Foun PNTL

Hatutan.com, (11 Agostu 2022), Díli- Primeiru Ministru (PM) nu’udár mós Ministru Interiór, Taur Matan Ruak, fó sai ona orden bá Komandu Jerál Polísia Nasionál Timor-Leste (PNTL) kona-bá kanselamentu prosesu rekrutamentu membru foun PNTL nian.

Lee Mós : PNTL Kontinua Menus Rekursu Umanu

Polísia Nasionál Timor Leste (PNTL). Foto/Média PNTL

Taur Matan Ruak, fó razaun katak, kanselamentu bá rekrutamentu membru foun PNTL ne’e tanba Governu konsentra hela ka tau matan hela bá situasaun ekonomia nasionál

“Dezenvolvimentu instituisaun hotu-hotu, inklui PNTL tenke tau matan mós ba ekonomia Timor-Leste tamba uainhira hahán uituan, hatama ema barak ne’e kualidade laiha hahán la to’o bele iha problema,” Taur Matan Ruak hateten lia hirak ne’e bá jornalista sira iha Palásiu Prezidensiál, Kinta (11/08/2022).

Taur Matan Ruak dehan, bainhira nia sei asume kargu nu’udár Jenerál iha instituisaun F-FDTL, nia planu mak F-FDTL só tinan 20 liu mak foin atinji membru 3000 no ida ne’e hatudu duni, tanba husi 2000-2022 sira foin atinji númeru 2600.

“PNTL rasik sa’e tiha ona membru 4000 depois hakarak aumenta osan, hahán no sira hanoin de’it katak Governu tenke haree deit mak PNTL no kiak sira iha foho ne’e halo nusa,” Taur afirma tan.

Tuir Taur Matan Ruak, rekrutamentu bá PNTL hodi aumenta forsa tenke haree mós bá ameasa no risku tanba labele hasa’e ema depois bá han de’it, ezije saláriu de’it depois tuur de’it kajerna.

“Ida-ne’e labele no tenke servisu,” PM Taur Matan Ruak  afirma tan. Xefe Governu ne’e hatutan uainhira sei asume pasta nu’udár  Ministru Interiór no Primeiru Ministru, maka PNTL nia rekrutamentu laiha, izola ida ne’e.

“Ha’u nia prióridade mak sira ne’ebé atinji ona tinan 60 tenke bá deskansa nune’e tenke altera lei para sira idade 60 bá deskansa  no joven sira avansa,” Taur subliña.

Jornalista: Vito Salvadór