TDD Aplika TIR bá Arguidu sira Kazu Ilísitu bá Droga

Hatutan.com, (15 Agostu 2022), Díli– Tribunal Distritál Dili (TDD) liuhosi  juis singular José Gonçalves, deside aplika medida koasaun Termu Identidade Rezidénsia (TIR) no Aprezentasaun Periódika bá arguidu na’in-sia (9) ne’ebé deskonfia envolve iha kazu ilísitu bá droga.

Lee Mós : Kazu Ilísitu bá Droga, MP Alega Prizaun Preventiva bá Arguidu sira

PCIC lori arguidu sira kazu ilísitiu bá droga bá TDD, Segunda (15/08/2022). Foto/Hatutan.com

Arguidu na’in-sia (9) ho inisiál DGS, MM, B, MAA, AY, SSO, M, CRM ho J iha obrigasaun legal atu aprezenta aan fulan ida dala ida iha Polísia Sientífika Investigasaun Kriminál  (PCIC).

Tribunál aplika medida koasaun ne’e, tanba laiha faktu sufisiente atu lori arguidu sira ba prizaun preventiva, maske arguidu sira konfesa faktu ne’ebé Ministériu Públiku (MP) aprezenta, maibé arguido sira hanesan vítima tanba sira konsumu de’it la’ós trafikante ka la’ós distribuidór.

Advogadu privadu Câncio Freitas, ne’ebé fó asisténsia legal bá arguido sira konsidera medida koasaun ne’e sufisiente bá nia kliente tanba lei nu.2/2017 kona-bá tráfiku droga fó vantajen bá arguido sira katak iha investigasaun tuir mai maka sei justifika.

Lee Mós : Ekipa Konjunta Detein Suspeitu Sira Sindikatu Droga, Mesak Sivilizadu Nia Oan

PCIC lori arguidu sira kazu ilísitiu bá droga bá TDD, Segunda (15/08/2022). Foto/Hatutan.com

“Iha produsaun de provas arguidu sira konfesa faktu hotu ne’ebé promove husi MP, maibé arguidu sira hanesan ema ne’ebé konsumu de’it bá droga ne’ebe iha no sira la’ós trafikante ka distribuidór droga tanba ne’e sira hanesan vítima tanba bazeia bá lei nu.2/2017 kona-bá tráfiku droga fó vantajen bá arguidu sira katak depois de medida koasaun ne’e iha faze investigasaun nia laran maka sei iha klareza arguidu sira iha ligasaun ho se de’it,” Advogadu Privadu Câncio Freitas ba jornalista sira hafoin desizaun iha TDD, Segunda (15/08/2022).

Iha audiénsia julgamentu bá primeiru interrogatóriu ne’e, Ministériu Públiku ne’ebé reprezenta hosi Prokuradór Rogério Viegas akuza arguidu sira ho krime ilísitu bá droga ne’ebé previstu iha artigu 7 hosi kódigu penal TL no lei 2/2017 kona-bá tráfiku droga.  

Jornalista : Carmelita Isaac