PM Taur Kontente ho Investimentu Fábrika bá Hahán Animal ho Mina-Te’in iha TL

Hatutan.com, (18 Agostu 2022), Díli-Primeiru Ministru (PM), Taur Matan Ruak, espresa nia kontente partisipa iha hatuur fatuk inan bá konstrusaun fábrika  prosesamentu hahán bá animal, hahán ikan, mina-te’in, fatin oho animal (matadouru) no sentru empakotamentu (packing) iha Maubara, Kinta (18/08/2022).  

PM Taur Matan Ruak ho Arsebispu Metropolitanu, Dom Virgílio do Carmo da Silva, SDB hatuur fatuk inan bá fábrika prosesamentu hahán bá animal nian, inklui hahán ikan no mina-te’in iha Maubara, Kinta (18/08/2022). Foto/Hatutan.com

Fábrika ne’ebé investe hosi Empreza Iranianu, Keshavarz Great Timor, Unip.Lda ne’e lokaliza iha Postu Administrativu Maubara, Munisípiu Liquiça. Nune’e, PM Taur konsidera investimentu privádu ne’e estratéjiku tebes bá Timor-Leste tanba durante ne’e dependente liubá produtu importadu sira, hanesan ezemplu ida mak kada fulan TL importa manu ho millaun 1.4. bá konsumu doméstiku.

“Projetu ida ne’e, ha’u hanoin, projetu ida  importante tebetebes iha ita-nia rain, sé ita-boot sira haree, depois funu Rúsia ho Ukránia, problema boot rua iha mundu enfrenta, ida maka hahán no ida seluk kombustivel,” PM Taur Matan Ruak iha komunikadu imprensa ne’ebé Hatutan.com asesu.

Bainhira haree didi’ak, TL nia dependénsia externa, hahán hosi rai-li’ur ne’e boot tebetebes. Iha tinan 20 nia laran, Governu ida bá no Governu seluk mai, fó prioridade bá ekonomia, prioridade númeru um mak Governu ne’e tenke transparente no responsavel atu bele hetan fiar hodi investidór sira mai elava nivel dezenvolvimentu ekonomia Timor nian.

Xefe Governu afirma, ho mudansa ne’ebé VIII Governu halo iha reforma fiskál, ne’ebé mais transparente, komesa dada interese investidór sira hosi li’ur atu mai investe iha rai-laran tanba Governu kria ona konfisoins.

Taur dehan, dezde asume  kna’ar hanesan Primeiru-Ministru, nia simu ona emprezáriu estranjeiru lubuk ida   ne’ebé mai pronúnsia katak sira iha kapitál  billions de’it. Maibé, hafoin buka tuir  sira-nia naran no enderesu laiha  plataforma  online hanesan website ka Facebook.

Iha investimentu privadu ida ne’e, empreza Keshavarz Great Timor, Unip.Lda, hatudu nia seriedade no halo ona investimentu Kinta Salom Farm iha Hera, hanesan hakiak  karau timur no vaka, bibi, ikan, manu lokál, manu rade  no seluk tan no halo tan  expansaun  ba Liquiça iha fábrika prosesamentu ne’ebé halo ona nia serimónia lansamentu konstrusaun ohin.

Serimónia hatuur fatuk inan bá konstrusaun fábrika prosesamentu hahán bá animal, inklui hahan ikan ho mina-te’in. Foto/Hatutan.com

“Foin dadaun, ha’u mós simu empreza Austrália ida, sira hakarak investe iha transformasaun na’an, primeira vez kompañia Austrália ne’e mai, primeiru nia hakarak saida? Nia hakarak timoroan sira bá servisu iha fábrika. Segundu, nia hakarak loke fábrika karau, para fa’an bá rai seluk. Aban, ha’u hasoru kompañia Samsung Korea nian, iha tán empreza boot ida hosi Austrália, ke hakarak mós. Portantu, tempu bá tempu, ema iha interese sériu mai iha ne’e, servisu ho ita, ita tenke kria ambiente negósiu di’ak, funsionáriu sira mós tenke onestu,” Taur fó hanoin.

Xefe Governu ne’e, garante katak, ho prezensa hosi fábrika refere, TL iha ona garantia bá merkadu, tanba ne’e husu ba agrikultór sira atu kuda barak matéria prima sira ne’ebé fabrika ne’e sei presiza hanesan hahán animál, ikan, no mina-te’in.

PM Taur, fó hanoin mós ba autoridade lokál no komunidade lokál buka koopera no tau matan ba investimentu refere, hodi kuidadu naran di’ak Timor-Leste nian, nune’e bele iha konfiansa ba investidór sira seluk labele ta’uk mai investe iha TL, hodi fó kampu traballu ba joven sira.

Xefe ezekutivu ne’e, agradese mós bá membru Oitavu Governu Konstitusionál nian, liu-liu Ministru Koordenadór Asuntu Ekonómiku (MKAE), Joaquim Amaral, tanba bele dada investor sira mai halo investimentu iha rai-laran.

Partisipa iha serimónia hatuur fatuk inan bá fábrika ne’e, Arsebispu Metropolitanu, Dom Virgílio do Carmo da Silva, SDB, membru Governu balun, Prezidente Camara Comerçio e Indústria Timor Leste (CCI-TL), Óscar Lima, autoridade Munisípiu Liquiça, no entidade importante sira seluk.

Jornalista: Rogério Pereira Cárceres