Hatutan.com, (19 Agostu 2022), Díli-Membru na’in-rua hosi Polísia Nasional Timor-Leste (PNTL), oras ne’e, ho kondisaun kanek grave, tanba hetan tuda ho bomba molotov hosi juventude balu iha área Comoro, Díli, bainhira fó hela seguransa ba serimónia graduasaun (sa’e sintu) hosi organizasaun arte-marsiál Persaudaraan Setia Hati Terate (PSHT) iha Timor Lodge, Díli, Kinta kalan (18/08/2022).
Membru PNTL ne’ebé hetan kanek. Foto/Supply
Membru PNTL na’in-rua ne’e, ho identidade Ajente Polísia Leonito C. Goncalves no Ajente prinsipál Nicolao dos Santos, hosi eskuadra Dom-Aleixo. Sira na’in-rua hetan kanek iha ulun no ain rezulta suku pontu lima.
Komandante Komandu PNTL Munisípiu Díli, Superintendente Xefe, Henrique da Costa, informa kazu ne’e akontese bainhira halo hela seguransa iha área Comoro.
“Suspeitu sa’e motór mak tuda bomba Molotov ba sira bainhira sira hala’o hela seguransa iha Timor Lodge ba serimónia graduasaun PSHT nian. Kazu ne’e mosu tanba membru PNTL hapara sira la taka kapasete ne’e mak diskute malu ida tun tebe ajente polísia ida depois ajente seluk halai bá ajuda ne’e mak sira soe bomba molotov (marotok) bá sira na’in-rua (2),” Superintendente Xefe Polísia Henrique da Costa, informa liuhosi komunikadu ne’ebé Hatutan.com, asesu, Kinta (19/08/2022).
Advertisement
Suspeitu ida seluk konsege halai lakon hosi fatin insidente, maibé ida seluk ho inisiál RbH, konsege asegura no PNTL prende mós motór ne’ebé mak sira kondús hodi halo asaun.
Membru PSHT sira ne’ebé kanek halo tratamentu iha ospitál. Foto/Supply
“Hosi akontesimentu ne’e polísia asegura ona suspeitu ida ho naran inisiál RBH, tinan 24, hela iha Aldeia Niken, Suku Bairru-Pité, Postu Dom Aleixo inklui motór ne’ebé uza hodi halo asaun brutal hasoru polísia ne’e no buka tuir suspeitu seluk ne’ebé hakanek membru polísia na’in-rua (2),” Henrique hateten.
Oras ne’e, daudaun membru PNTL na’in-rua (2) ne’e halo tratamentu saúde iha Klínika Kampung Baru, Comoro, enkuantu suspeitu RBH detein hela durante 72h hodi kompleta prosesu.
Hosi sorin seluk, akontese mós ema balun tuda hasoru membru PSHT sira no rezulta membru PSHT balun kanek iha ulun no tenke evakua bá halo tratamentu intensivu iha ospitál.