Telemor Rekoñese Fornese Liña Internet La Saudável ba Kliente TL

Hatutan.com, (22 Agostu 2022), Díli–Viettel group Telemor Timor Leste, rekoñese liña internet kontinua sai dezafiu no problema boot ne’ebé kliente sira enfrenta, tanba TL laiha kabu submariñu ne’ebé bele garante fornesimentu dadus no liña internet  saudável ba kliente sira.

Diretór Jerál Viettel group Telemor Timor Leste, Tran Van Bang ho nia ekipa hasoru-malu ho Xefe Estadu José Ramos-Horta iha Palásiu Prezidensiál Nicolau Lobato Bairru-Pité, Segunda (22/08/2022). Foto/Hatutan.com.

Diretór Jerál Viettel group Telemor Timor Leste, Tran Van Bang ho nia ekipa hasoru malu ona ho Xefe Estadu José Ramos-Horta hodi hato’o ona sira nia estratejia ba futuru kona-bá sosiedade dijitál no liuliu kona-bá situasaun ne’e.

Lee Mós: MTK Orienta Ona ANC Fó-Atensaun ba Fornesedór Internet

Durante ezisténsia Viettel group liu husi servisu Telemor, fó ona kontribuisaun ba sosiedade iha tinan 10 ne’e, haree liu kona-bá mobile service, tanba antes ne’e operadór ida ka rua de’it, nune’e ho Telemor nia prezensa ho presu tun, no ema barak mak uza liu mobile service ba asesibilidade internet.

“Telemor aumenta tan teknolójia, 2G, 3G, 4G, no mós 4G+, no agora daudaun iha prosesu impmentasaun, modernizasaun, no dijitalizasaun atu bele atinji 5G tuir espetativa públiku,” Tran Van Bang hateten hafoin hasoru-malu ho José Ramos-Horta iha Palásiu Prezidensiál Nicolau Lobato Bairru-Pité, Segunda (22/08/2022).

Diretor Jerál Viettel group ne’e promete katak, Telemor sei koopera no buka meius atu servisu nafatin, atu bele update ba kliente sira relasióna ho probelma liña internet.

Bainhira Timor Leste iha ona kabu submariñu no dada tama mai Timor Leste, automatikamente buat hotu la’o ho di’ak, liu-liu liña internet.

“Iha área rurál, oras-ne’e daudaun kliente barak sei enfrenta difikuldade liga ho liña internet. Tanba ne’e Telemor oras ne’e koopera hela ho empreza boot iha mundu, hanesan Google no Facebook hodi halo rekuperasaun ba liña internet, nune’e iha futuru bainhira kabu submariñu tama buat hotu la’o di’ak,” nia dehan.

Telemor iha torre hamutuk 200 ne’ebé kobre Timor laran tomak no Telemor oras ne’e fó sevisu ba ema hamutuk 240, hosi númeru ne’ebé iha 90% Timoroan.

Jornalista: Vito Salvadór