Komunidade Fó Aluga Tutan Rai-Uma Estadu ba Xineza Tanba Hetan Autorizasaun Hosi SETP

Hatutan.com, (23 Agostu 2022), Díli– Uma no rai Estadu ne’ebé lokaliza iha área Comoro, Rotunda Nicolau Lobato ne’ebé maioria okupante sira fó aluga tutan ba Xineza hodi loke loja, supermerkadu no sira seluk tán, iha koñesimentu hosi Governu tanba hetan autorizasaun hosi Sekretáriu Estadu Terras no Propriedade (SETP).

Ambiente loja Wang Zung (WZ), iha Kampung Baru Comoro, Tersa (01/01/2022).Foto/Hatutan.com.

Tanba ne’e, Xefe suku Comoro interinu, Hegenio da Costa Nunes rezeita katak xineza sira loke loja ne’e illegál.

Lee Mós: Ministru Justisa Husu CAC Involve iha Monitorizasaun ba Arrendamentu Rai Estadu

“Maski ha’u la lembra númeru serteza hosi xineza sira ne’e, maibé antes xineza sira halo konstrusaun, ami sempre halo pedidu ba  parte Obras Públiku no Diresaun Terras no Propriadades hodi foti desizaun no iha autorizasaun hodi fó aluga tutan maka konstusaun foin bele halo. Maibé, ba hirak ne’ebé laiha rekoñesimentu hosi Estadu, ne’e kompeténsia Estadu hodi tun diretamente haree, tanba uma Estadu nian hirak ne’e abandonadu no Estadu nunka mai haree,” Xefe suku Comoro Interinu Hegenio da Costa Nunes ba Hatutan.com iha nia knaar fatin Comoro, Tersa (23/08/2022).

Iha parte seluk, Sekretáriu Estadu Terras no Propriedade (SETP) Eldino Rodrigues dos Santos, laiha koñesimentu kona-bá situasaun ne’e no konsidera sidadaun ne’ebé fó aluga tutan uma no rai Estadu ba xineza hodi halo negósiu sen koñesimentu hosi SETP, hanesan krime tanba Estadu de’it mak iha direitu atu administra.

“Ha’u simu ona informasaun ne’e no iha tempu badak ekipa sei ba haree, tanba arrendamentu ka fó aluga tutan ha’u hanoin ne’e la loos tanba rai ne’ebé Estadu nian Estadu de’it mak bele administra no ba hirak ne’ebé halo negósiu tantu hosi rai laran ka rai liur tenki halo kontratu direta ho Estadu. Bainhira la’ós na’in no rai ne’e Estadu nian mak fó aluga tutan, ne’e hanesan krime,” Eldino Rodrigues dos Santos hateten.

Antes ne’e, ekipa hosi Ministériu Justisa (MJ) inklui Terras no Propriedade hahú halo inspesaun no identifikasaun ba rai no uma Estadu iha área Fatuhada no Loron-matan ne’ebé sidadaun okupa maibé la selu arrendamentu inklui fó aluga tutan ba ema seluk.

Iha inspesaun ne’e, MJ identifika ona empreza nasionál no internasionál hamutuk 20-resin ne’ebé fó aluga tutan rai Estadu no fa’an fali ba ema seluk sen autorizasaun hosi MJ.

Tanba ne’e, bainhira rezultadu relatóriu inspesaun hatudu katak iha ema fa’an no fó aluga tutan rai Estadu sen koñesimentu maka sei halo  partisipasaun ba Ministéru Públiku (MP)  tanba  konsumu ona krime frauda fiskál ne’ebé la kontribui ba taxa Governu.

Kritéria atu fó aluga tutan rai Estadu ba ema seluk maka tenki hato’o pedidu ba Diresaun Terras no Propriedade atu nune’e Governu mak termina folin ne’ebé ki’ik no diferente ho ema ne’ebé aluga primeiru.

Bazeia ba dekretu lei númeiru 19/2004 loron 29 fulan dezembru kona-bá rejime jurídiku bens imóveis no afestasaun ofisiál no arrendamentu bens imóveis dominu privadu do Estadu hakerek momoos katak, rai no uma ne’ebé husik hela iha tempu Portugés no Indonézia pertense ba Estadu TL nian, tanba ne’e Estadu mak iha podér tomak atu administra.

Jornalista: Carmelita Isaac