Tenente Jenerál Falur Rate Laek Mak Propoin Fó Kondekorasaun Medalla Méritu bá Hendropriyono

Hatutan.com, (24 Agostu 2022), Díli-Ema barak, inklui ativista sira hosi organizasaun oioin sosiedade sivíl nian iha Timor-Leste hato’o sira nia kritika no lamenta tebetebes ho desizaun Prezidente Repúblika (PR), José Ramos-Horta nian hodi atribui medalla méritu bá Jenerál reformadu Hendropriyono.

Lee Mós : ANTI Kontra Kondekorasaun ba Jenerál Reformadu Hendropriyono

PR Ramos-Horta atribui medalla merítu bá Jeneral reformadu, Hendropriyono, Sábadu (20/08/2022). Foto/Espesiál

Iha selebrasaun aniversáriu FALINTIL ba da-47, 20 fulan-Agostu 2022, Xefe Estadu uza nia direitu prerogativu hodi  atribui medalla merítu bá Jeneral na’in-tolu; kompostu hosi Jenerál Tentara Nasional Indonesia (TNI) Andika Perkasa, Almirante António Manuel Fernandes da Silva Ribeiro, Jenerál Forsa Armada  Portugal   Jenerál Angus Campbell hosi Austrália.

Hosi jenerál na’in-tolu ne’e,  Ramos-Horta mós atribui medalla méritu ne’e bá antigu xefe BIN  (Badan Intelijen Nasional)  nu’udár pesoa ida ne’ebé hola parte iha operasaun Seroja iha Timor-Leste iha 1975, Abdullah Makhmud Hendroprioyono.

Organizasaun sosiedade sivíl ne’ebé halibur malu iha Aliansa Nasional bá Tribunal Internasionál (ANTI) lamenta ho polítika Prezidente Repúblika (PR), José Ramos-Horta ne’ebé lori dokumentu Fraternidade Umana hodi halo promosaun iha Timor Leste (TL) tanba hamosu polémika iha sosiedade timorense ho kondekorasaun bá Jenerál Reformadu Hendropriyono ne’e.

Bá preokupasaun, kritika no lamentasuna sira-ne’e hotu, Ramos-Horta afirma, Estadu Timor-Leste  fó kondekorasaun medalla  méritu bá  Jenerál reformadu no veteranu operasaun Seroja Hendropriyono tanba hetan rekomendasaun hosi Xefe Estadu Maiór FALINTIL-Forsa Defeza Timor Leste (F-FDTL).

Ramos-Horta, Kuarta (24/08/2022), konfirma katak proposta kondekorasaun bá Xefe Estadu-Maiór Jenerál Forsa Armada husi Portugál, Almirante António Manuel Fernandes da Silva Ribeiro, Xefe Estadu-Maiór Jenerál Forsa Armada hosi Commonwealth Austrália, Jenerál Angus Campbell, Xefe Estadu-Maiór Jenerál Forsa Armada Repúblika Indonézia, Jenerál Andika Perkasa, no eis-Ministru no eis-Xefe Servisu Nasionál Intelijénsia Repúblika Indonézia no Veteranu husi Operasaun Seroja, Hendropriyono tamba hetan rekomedasaun hosi Xefe Estadu Maiór F-FDTL, Tenente Jenerál Falur Rate Laek.

“Ita boot sira di’ak liu bá Kuartél F-FDTL husu ba Xefe Estadu Maiór F-FDTL Tenente Jenerál Falur Rate Laek nia esplikasaun, tanba proposta ne’e la’ós ha’u mak mehi no halo, maibé proposta ne’e mai hosi Xefe Estadu F-FDTL para kondekora ofisiál na’in haat ne’e,” José Ramos-Horta hateten.

Ramos-Horta hatutan rekomendasaun mai hosi instituisaun F-FDTL no nia parte kolabora ho instituisaun forsa armada nune’e sira mak hatene no klaru katak sira ida-idak ho nia kurikulum, maibé razaun ruma kle’an eis Jenerál Indonézia Hendropriyono hetan kondekorasaun ne’e Xefe Estadu Maiór F-FDTL Tenente Jenerál Falur Rate Laek mak bele esplika didi’ak.

“Ha’u tane Xefe Estadu Maiór F-FDTL Tenente Jenerál Falur Rate Laek nia rekomendasaun,” Ramos-Horta afirma.

Jornalista: Vito Salvadór