LFTL Prontu Organiza Liga Timorense Époka 2022-2023

Hatutan.com, (02 Setembru 2022), Díli—Liga Futeból Timor Leste (LFTL) prontu organiza liga Timorense ba primeira no segunda divizaun époka 2022-2023.

Prezidente LFTL, Nilton Telmo Gusmão dos Santos. Foto/Hatutan.com

“Em prinsípiu LFTL eziste atu organiza atividade futeból iha rai laran. LFTL mós sempre disponível maibé órgaun LFTL depende ba Governu liuliu SEJD no mós FFTL,” Prezidente LFTL, Nilton Gusmão hateten iha sede LFTL estádiu munisipál Díli, Kinta (01/09/2022).

Lee Mós: Polémika Liga Timorense Époka 2022-2023, FFTL Hein Órgaun LFTL

Desde inísiu tinan 2022, órgaun LFTL iha ona paixaun no vontade boot atu organiza liga iha primeira no segunda divizaun maibé infelizmente la konsege realiza tanba iha impedimentu balun.

“Órgaun LFTL nafatin iha pozisaun ida firme no ho disponibilidade tomak atu organiza liga Timorense iha kualkér momentu,” Nilton Gusmão deklara.

Órgaun ezekutivu Liga Timorense iha ona hanoin atu halo komunikasaun ho klube sira primeira no segunda divizaun atu iha reuniaun ida hodi rona klube sira nia opiniaun kona-bá Liga Timorense époka 2022-2023 no mós ba oin hotu-hotu hamutuk haree oinsa problema sira ne’ebé hasoru, nune’e órgaun liga hahú organiza.

Órgaun  liga sempre hanoin katak, buat hotu-hotu ne’ebé planeia no halo tiha ona desde uluk to’o agora, mantein no tenke la’o nafatin tuir kondisaun ne’ebé iha.

Maibé, iha sirkunstánsia balun no depende ba SEJD, FFTL no mós patrosinadór balun nune’e situasaun balun difikulta atu tuir beibeik saida mak ema hotu hakarak.

“LFTL kompremetidu nafatin no sei buka atu angaria forsa hotu-hotu, depois bele organiza liga iha tempu badak maske subsídiu ne’ebé Gobernu liu hosi SEJD no FFTL tau de’it $ 400.000 no orsamentu ne’ebé kada époka LFTL presiza besik $600.000 to’o $700.000 tanba ne’e sei halo esforsu atu maximiza fundus ne’ebé iha hodi organiza liga époka ne’e,” nia subliña.

Impedimentu ne’ebé LFTL hasoru maka, FFTL rasik husu atu órgaun liga labele organiza lai liga iha inísiu tinan nian hodi hein to’o 18 Agostu tanba ne’e órgaun liga mós hein maibé infelizmente Agostu remata ona no liga Timorense rasik bainhira mak bele hahú.

Tanba, antes ne’e LFTL halo ona pedidu ba FFTL atu hahú halo divulgasaun informasaun ba transferénsia jogadór maibé to’o agora resposta laiha no situasaun ne’e mak prezudika liga Timorense to’o oras ne’e seidauk hahú.

Futeból atu la’o ba oin hotu-hotu tenke iha vontade ho apoiu no fo autorizasaun atu nune’e futeból iha Timor Leste bele la’o labele ko’alia de’it iha média maibé prátika laiha.

Komunikasaun importante, parte LFTL halo ona komunikasaun desde inísiu liu hosi karta formál maibé laiha resposta no ikus mai mosu espekulasaun katak, órgaun liga mak laiha vontade no diverjénsia sira ne’e loloos ne’e laiha, maibé tanba de’it falta komunikasaun.

“Komunikasaun importante atu futeból ba oin no ha’u hakarak subliña katak órgaun liga iha vontade boot tebtebes atu organiza liga no ida-ne’e servisu LFTL nian duni, maibé apoiu no autorizasaun mai hosi FFTL no SEJD duni,” nia dehan.

Jornalista: Vito Salvadór